వైఎస్ వివేకా హత్యపై లోకేష్ సవాల్: వైసీపీ ఎదురుదాడిని ఏమనాలబ్బా.?

తిరుపతి ఉప ఎన్నికకీ వైఎస్ వివేకానందరెడ్డి హత్యకీ లింకేంటబ్బా.? ఏపీ రాజకీయాల్లో ఇప్పుడీ అంశంపై ఆసక్తికరమైన చర్చ జరుగుతోంది. ‘మాట తప్పను.. మడమ తిప్పను..’ అని గట్టిగా చెప్పుకునే వైఎస్ జగన్ మోహన్ రెడ్డి, తాను ప్రతిపక్ష నేతగా వున్నప్పుడు సీబీఐ విచారణ కోరి, అధికారంలోకి వచ్చాక సీబీఐ విచారణను వద్దనేశారు బాబాయ్ వైఎస్ వివేకానందరెడ్డి హత్యకు సంబంధించి. వైఎస్ వివేకా కుమార్తె న్యాయ పోరాటం ఫలించి, కేసు విచారణ సీబీఐ చేతికి వెళ్ళింది. ‘సీబీఐ చేతిలో వున్న కేసు గురించి, రాష్ట్ర ప్రభుత్వాన్ని ప్రశ్నించడమేంటి.?’ అంటూ వైసీపీ నేతలు అమాయకంగా మీడియా ముందుకొచ్చి ఎదురుదాడికి దిగుతున్నారు విపక్షాల మీద. చనిపోయింది వేరెవరో అయితే అది ఇంకో చర్చ.

సాక్షాత్తూ సొంత బాబాయ్ హత్యకు గురైతే, ‘సీబీఐ విచారిస్తోంది కదా..’ అని ముఖ్యమంత్రి వైఎస్ జగన్ చేతులు దులుపుకుంటామంటే, అంతకన్నా హాస్యాస్పదం ఇంకేముంటుంది.? ఇక, ఈ విషయంపై నారా లోకేష్ సంచలన రీతిలో సవాల్ విసిరేశారు ఈ మధ్యనే. ‘వైఎస్ వివేకా హత్యతో మీకుగానీ, మీ కుటుంబ సభ్యులకుగానీ సంబంధం లేకపోతే, తిరుమల తిరుపతి శ్రీ వెంకటేశ్వరస్వామి మీద ప్రమాణం చేయండి..’ అన్నదే ఆ సవాల్ సారాంశం. కానీ, ఇంతవరకు అధికార పార్టీ నుంచి ఈ సవాల్ మీద సానుకూలంగా స్పందించింది లేదు. ‘స్వర్గీయ ఎన్టీఆర్ మీద చంద్రబాబు వెన్నుపోటు’ అంశం అధికార పార్టీ నుంచి ప్రస్తావనకు వస్తోంది. అదీ తేలాలి.. ఇదీ తేలాలి. అందుకే, ఇద్దరూ (టీడీపీ, వైసీపీ) ఆ రెండు అంశాల మీదా వెంకన్న సాక్షిగా ప్రమాణాలు చేసేస్తే మంచిదే.. రాష్ట్ర ప్రజలకీ ఓ అవగాహన వస్తుంది. గొడ్డలి వేటుకి వైఎస్ వివేకానందరెడ్డి నేలకొరిగితే, గుండెపోటుగా ఎందుకు అభివర్ణించాల్సి వచ్చింది.?

రక్తపు మరకల్ని ఎందుకు మాయం చేయాల్సి వచ్చింది.? అన్న ప్రశ్నల చుట్టూ విచారణ జరగాల్సిన రీతిలో జరిగి వుంటే, ఈపాటికే సమాధానం దొరికేది. ఎక్కడో తేడా కొడుతోంది.. అందుకే, వివేకా డెత్ మిస్టరీ.. ఎప్పటికీ ఓ మిస్టరీగానే మిగిలిపోయేలా వుంది. ‘నా సవాల్‌కి ప్రభుత్వం సమాధానం చెప్పడంలేదు. మౌనాన్ని అర్థాంగీకారం.. అనుకోవాలా.?’ అని నారా లోకేష్ నిన్న తాజాగా ఇంకోసారి వ్యాఖ్యానించిన దరిమిలా, తిరుపతి ఎన్నికల ప్రచారంలో అయినా వైఎస్ జగన్ ఈ ప్రశ్నకు సమాధానమిస్తారేమో వేచి చూడాలి.