ఇది డెమోక్రసి కాదట.. జగన్ కసి అట..!

ఏపీలో అధికార, విపక్షాల మధ్య వార్ మరింత ముదురుతోంది. ఏపీ అభివృద్ధి వికేంద్రీకరణ బిల్లును తెలుగుదేశం పార్టీ శాసనమండలిలో అడ్డుకుని సెలెక్ట్ కమిటీకి పంపించడంతో రగలిపోతున్న అధికార వైఎస్సార్ సీపీ.. టీడీపీని కోలుకోలేని దెబ్బ కొట్టాలని యోచిస్తోంది. ఇందులో భాగంగా తనకు రాజకీయంగా నష్టం జరిగినా సరే.. మండలిని రద్దు చేయడానికీ వెనకాడటంలేదు. మండలి భవితవ్యం తేలడానికి ఇంకా మరికొద్ది గంటలే మిగిలి ఉంది.

ఈలోగా టీడీపీ ఎమ్మెల్సీలు మనసు మార్చుకుని ప్రభుత్వానికి మద్దతుగా నిలిస్తే, మండలి ఉంటుందని.. లేకుంటే కాలగర్భంలో కలిసిపోతుందని అధికార పార్టీ నేతలు గట్టిగానే హెచ్చరికలు చేస్తున్నారు. తెలుగుదేశం పార్టీ దీనిపై తీవ్రంగా మండిపడుతోంది. మండలి రద్దు రాష్ట్రం పరిధిలోని అంశం కాదని.. అది కేంద్రం నిర్ణయం తీసుకోవాల్సిన అంశమని.. అందువల్ల ఎమ్మెల్సీలు ఎవరూ భయపడాల్సిన అవసరం లేదని చంద్రబాబు చెబుతున్నారు.

మండలి వ్యవహారంలో టీడీపీ నేతలు పైకి గంభీరంగా కనిపిస్తున్నప్పటికీ.. నిజంగా శాసనమండలిని రద్దు చేస్తే తలెత్తే పరిణామాలు ఏమిటని చర్చిస్తున్నారు. ఈ నేపథ్యంలో సీఎం జగన్ నిర్ణయాన్ని తూర్పారబడుతున్నారు. మనం డెమోక్రసిలోని లేమని, ఇది జగన్ కసి అని విశ్లేషణలు చేస్తున్నారు. మండలి రద్దుకు రాష్ట్రానికి అధికారమే లేదని మండలిలో విపక్ష నేత యనమల పేర్కొంటున్నారు. ప్రభుత్వానికి అంత పట్టుదలగా ఉంటే శాసనసభను కూడా రద్దు చేయండంటూ సవాల్ చేస్తున్నారు.

టీడీపీ జాతీయ ప్రధాన కార్యదర్శి లోకేశ్ సైతం సర్కారుపై విమర్శలు గుప్పిస్తున్నారు. వాస్తవానికి మండలి రద్దు అయితే ఎక్కువగా నష్టపోయేది యనమలే. ఆయన పదవీకాలం 2025 వరకు ఉన్నందునే ఆయనలో అసహనం పెరిగి, మాట్లాడితే శాసనసభను కూడా రద్దు చేయాలంటూ డిమాండ్ చేస్తున్నారని వైసీపీ నేతలు ఎద్దేవా చేస్తున్నారు.

మరోవైపు మండలి వ్యవహారంలో ఎలా ముందుకెళ్లాలనే అంశంపై అధికార పార్టీ సమాలోచనలు చేస్తోంది. టీడీపీ ఎమ్మెల్సీలు ఆ పార్టీని విభేదించి వస్తే మండలి రద్దుపై పునరాలోచన చేసే పరిస్థితులు కనిపిస్తున్నాయి. ఇదిలా ఉండగా.. ఆదివారం జరిగిన టీడీఎల్పీ భేటీకి ఐదుగురు ఎమ్మెల్సీలు గైర్హాజరు కావడం చర్చనీయాంశమైంది. అయితే, వారంతా వివిధ కారణాలరీత్యా హాజరుకాలేకపోతున్నామని ముందుగానే సమాచారం ఇచ్చారని టీడీపీ వర్గాలు చెబుతున్నాయి. ఇక సోమవారం నాటి శాసనసభ సమావేశానికి హాజరుకాకూడదని టీడీఎల్పీ భేటీలో నిర్ణయం తీసుకున్నారు.