చేతులెత్తేసిన ఏపీ సర్కార్: డబ్బుల్లేవ్.. మేమేటి సేత్తాం.?

కరోనా పాండమిక్ నేపథ్యంలో రాష్ట్రాలు అప్పులు చేయడం వింతేమీ కాదు. ఎక్కడ అప్పు దొరికితే అక్కడ పండగ చేసుకోవడం తప్ప ఇప్పుడున్న పరిస్థితుల్లో రాష్ట్రాలకు వేరే మార్గం లేదు. కేంద్రం కూడా అదే పని చేస్తోంది. రికార్డు స్థాయిలో అప్పులు చేస్తూ, మరిన్ని అప్పలు చేయడానికి కేంద్రమూ తనదైన వ్యూహాలకు పదును పెడుతోంది.

ధనిక రాష్ట్రం తెలంగాణ కూడా అప్పులు చేస్తున్నప్పుడు, రాష్ట్రం ఏర్పడినప్పటినుంచీ అప్పుల బాధతో సతమతమవుతున్న 13 జిల్లాల ఆంధ్రపదేశ్ ఎందుకు కొత్త అప్పులు కొత్త కొత్తగా చెయ్యదు.? కానీ, ఓ పక్క తమ పాలన అద్భుతం.. స్వర్ణయుగం.. అంటూ పబ్లిసిటీ చేసుకుంటూ, ఇంకోపక్క నెల వారీ అప్పుల స్థాయి దాటేసి, రోజువారీ అప్పులనేలా ఎప్పటికప్పుడు కొత్త కొత్త అప్పులు చేస్తోంటే విమర్శలు రాకుండా వుంటాయా.?

ఈ వ్యవహారంపై పెద్దయెత్తున దుమారం చెలరేగుతోంటే, ఆర్థిక మంత్రి బుగ్గన రాజేంద్రనాథ్ రెడ్డి, ‘బుడగ’ పేల్చేశారు. రాష్ట్రం ఇప్పుడున్న పరిస్థితుల్లో అప్పులు చేయకపోతే కష్టమని తేల్చేశారు. ప్రజల్ని ఆదుకోవాలంటే అప్పులు చేయడమే మార్గమన్నారు. మరి, చంద్రబాబు హయాంలో అప్పులు జరిగినప్పుడు ఎందుకు విమర్శించారయ్యా.? అంటే, బుగ్గన దగ్గరే కాదు, వైసీపీ నేతలెవరిదగ్గరా సమాధానం దొరకదు.

సంక్షేమ పథకాల విషయంలో ఎప్పటికప్పుడు రికార్డుల గురించి చెప్పుకుంటున్న జగన్ సర్కార్, ఈ అప్పుల రికార్డుల గురించి కూడా పత్రికల్లో ప్రకటనలు ఇచ్చుకుంటే బావుంటుందేమో. గత కొన్ని నెలలుగా ఉద్యోగస్తులకు జీతాలు మొదటి తారీఖున అందడం గగనమైపోయింది. కానీ, సంక్షేమ పథకాల పబ్లిసిటీ మాత్రం ఆగడంలేదు.

రాష్ట్ర చరిత్రలో ఈ నెల అత్యంత భారంగా గడుస్తోందనే అభిప్రాయం, రాష్ట్ర పరిస్థితిని విశ్లేషిస్తోన్న ఆర్థిక రంగ నిపుణుల నుంచి వ్యక్తమవుతోంది. మరి, వచ్చేనెల పరిస్థితి ఎలా వుండబోతోంది.? కేంద్రేమో.. అవసరానికి మించి రాష్ట్రం అప్పులు చేస్తోందని.. సామర్థ్యానికి మించి అప్పులు చేసేసిన దరిమిలా, కొత్త అప్పులు చేయడం కుదరదంటూ రాష్ట్రానికి తేల్చి చెప్పిందాయె. కానీ, ఆ అప్పులే లేకపోతే, రాష్ట్రం ఒక్క అడుగు కూడా ముందుకు పడే అవకాశం లేదాయె.

గత రెండేళ్ళుగా రాష్ట్రంలో అభివృద్ధి పడకేసింది. రాజధాని లేని రాష్ట్రం.. అప్పులతో ఎన్నాళ్ళు నెట్టుకురాగలుగుతుంది.? సొంత పబ్లిసిటీనే మస్ట్.. రాష్ట్ర రాజధాని వేస్ట్.. అన్నట్టు ఆలోచన చేస్తోన్న అధికార వైసీపీ, ముందు ముందు ప్రజల్ని ఇంకెంతలా ముంచేస్తుందో ఏమో.