జస్ట్ ఆస్కింగ్: పోలవరం ప్రాజెక్టు.. ఇవన్నీ వాస్తవాలేనా.?

పోలవరం ప్రాజెక్టుకి సంబంధించి స్పిల్ వే పనులు శరవేగంగా జరుగుతున్నాయి.. స్పిల్ ఛానల్ పనులు కూడా దాదాపు ఓ కొలిక్కి వచ్చేశాయి.. ఇంకోపక్క కఫర్ డ్యామ్ సహా అనేక కీలకమైన పనులు అత్యంత వ్యూహాత్మకంగా, శరవేగంగా జరుగుతున్నాయి.. ఇదీ గత కొద్ది రోజులుగా జరుగుతున్న ప్రచారం తాలూకు సారాంశం. ఈసారి వరద వస్తే, నీటిని ప్రస్తుతం వున్న ప్రవాహంలా కాకుండా, ప్రవాహం దారి మళ్ళించి గేట్ల గుండా పంపించబోతున్నారట.

వినడానికి ఎంత అద్భుతంగా వుందో పోలవరం ప్రాజెక్టుకి సంబంధించి ఈ విషయాలపై మీడియా కథనాలు వస్తోంటే. ఎన్నాళ్ళకెన్నాళ్ళకు.? పోలవరం ప్రాజెక్టు పూర్తవుతుందా.? లేదా.? అన్న అనుమానాల నుంచి కాస్త ఉపశమనం కలుగుతోంది. పోలవరం, ఆంధ్రపదేశ్ ప్రజల జీవనాడిగా అభివర్ణిస్తుంటారు రాజకీయ పరిశీలకులు. అది నిజం కూడా. అందుకే, బ్రిటిష్ హయాంలోనే ఈ ప్రాజెక్టు ఆలోచన జరిగింది.

వైఎస్ రాజశేఖర్ రెడ్డి హయాంలో పనులు ప్రారంభమయ్యాయిగానీ.. అంతకంటే ముందే, పోలవరం ప్రాజెక్టుకి సంబంధించి బీజం పడింది.. శంకుస్థాపనలు చేశారు. శిలా ఫలకాలు పాతారు. వైఎస్సార్ హయాంలో కాలువలు తవ్వి, నిండా దోచేసుకున్నారన్న విమర్శలున్నాయి. వైఎస్సార్ మరణానంతరం పోలవరం ప్రాజెక్టుకి మరింతగా గ్రహణం పట్టేసింది.

ఉమ్మడి తెలుగు రాష్ట్రం విభజనతో పోలవరం ప్రాజెక్టుకి జాతీయ హోదా వచ్చింది. ఆ తర్వాతనే, పోలవరం ప్రాజెక్టు పనులు కాస్త వేగం పుంజుకున్నాయి. చంద్రబాబు హయాంలో స్పిల్ వే పనులు జోరందుకున్నమాట వాస్తవం. ఆ తర్వాత వైఎస్ జగన్ హయాంలో రివర్స్ టెండరింగ్ పేరు చెప్పి చాన్నాళ్ళు పోలవరం ప్రాజెక్టు పనులు ఆపేశారు. లేదంటే, ఈపాటికి పోలవరం ప్రాజెక్టు పూర్తయిపోయేదే. ఇక, 1600 కోట్ల రూపాయల మేర బిల్లులు పెండింగ్.. అని రాష్ట్ర ప్రభుత్వం చెబుతోంది. ఈ నిధులు కేంద్రం ఇవ్వాల్సి వుంది. ఆ నిధుల్ని త్వరగా రాబట్టాలని ముఖ్యమంత్రి వైఎస్ జగన్, అధికారుల్ని ఆదేశించారు. ఇలా ఆదేశించే పరిస్థితి ఎందుకు వస్తోంది.? అన్నదే మిలియన్ డాలర్ల ప్రశ్న.

పోలవరం.. జాతీయ ప్రాజెక్టు.. అవసరమైన మేర నిధులు కేటాయించాల్సిన కేంద్రం, అడుక్కుంటే తప్ప ఇవ్వని దుస్థితికి కారణమేంటి.? ఇంతకీ, అతి త్వరలో పోలవరం ప్రాజెక్టు పూర్తయిపోవడం ఖాయమేనా.? ముంపు, పునరావాసం వ్యవహారాల మాటేమిటి.? ఇవన్నీ ప్రస్తుతానికి మిలియన్ డాలర్ల ప్రశ్నలే.