YS Avinash Reddy: ‘అవినాశ్ రెడ్డిని కస్టడీలోకి తీసుకుని విచారించాల్సిన అవసరం వుంది..’ అని సీబీఐ బలంగా నమ్ముతోందిట. నమ్మడమేంటి.? హైకోర్టుకు ఇదే విషయాన్ని తెలిపిందట. మాజీ ఎంపీ వైఎస్ వివేకానంద రెడ్డి హత్య కేసులో కడప ఎంపీ అవినాశ్ రెడ్డిపై ఆరోపణలు వస్తున్న సంగతి తెలిసిందే.
రేపే మాపో అవినాశ్ రెడ్డి అరెస్టు తప్పదంటూ గత కొద్ది రోజులుగా మీడియాలో పెద్ద ‘నాటకం’ నిత్య కృత్యమైపోయింది. పులివెందులలో మోహరించిన సీబీఐ.. హైద్రాబాద్లో అరెస్టు చేసేందుకు రంగం సిద్ధం.. ఇలా జరుగుతోంది ప్రచారం.
అరెస్టుపై అవినాశ్ రెడ్డికీ స్పష్టమైన సంకేతాలుండబట్టే, ముందస్తు బెయిల్ కోసం ప్రయత్నించారు, చూచాయిగా విజయం సాధించారు కూడా. అంతలోనే, చేదు వార్త.. సర్వోన్నత న్యాయస్థానం నుంచి షాక్.! అవినాశ్ బెంబేలెత్తారుగానీ, సీబీఐ ఇంతవరకు ఆయన్ని అరెస్టు చేయలేదు.
హైకోర్టులో మాత్రం ముందస్తు బెయిల్ వ్యవహారంపై వాదనలు కొనసాగుతూనే వున్నాయి. మధ్యలో బ్రేక్.. అదేనండీ, వేసవి సెలవులు.. ఈసారి అవినాశ్ రెడ్డికి మరింత ఊరట. మరోపక్క, ఈ కేసులో సీబీఐ కౌంటర్ దాఖలు చేసింది.. అవినాశ్ రెడ్డిని కస్టడీలోకి తీసుకోవాల్సి వుందని అందులో పేర్కొంది.
గూగుల్ టేకౌట్ ద్వారా అవినాశ్ రెడ్డి బండారం బట్టబయలు చేసిన సీబీఐ, ఎందుకు ఇంకా మీనమేషాల్లెక్కుడుతున్నట్లు.? ఇదో మిలియన్ డాలర్ మిస్టరీ. కర్నాటక అసెంబ్లీ ఎన్నికలు ముగిసేవరకు అవినాశ్ రెడ్డి అరెస్టు జరగదట. ఇదేం లాజిక్కో మరి.! లాజిక్కో.. మ్యాజిక్కో.. అదే నిజమయ్యేలా వుంది.