ఈ సంక్రాంతికి ప్రముఖ నిర్మాత ‘దిల్’ రాజు నిర్మించిన సినిమా ఏదీ విడుదల కాలేదు. కానీ, సంక్రాంతి సినిమాల హంగామాలో ‘దిల్’ రాజు పేరే ఎక్కువగా వినిపించింది. ఔను, ‘దిల్’ రాజుకి సంక్రాంతి సినిమాలతో సంబంధం వుంది.
సంక్రాంతి బరిలో ఐదు సినిమాలు తొలుత నిలిచాయి.! అందులోంచి ‘ఈగల్’ సినిమా ఔట్ అయ్యింది. ఈ అడ్జస్ట్‌మెంట్ జరగడం వెనుక ప్రముఖ నిర్మాత దిల్ రాజు కీలక పాత్ర పోషించారన్నది బహిరంగ రహస్యం.
దిల్ రాజు అంటే కేవలం నిర్మాత మాత్రమే కాదు, అంతకు మించి.! డిస్ట్రిబ్యూటర్.. అలాగే, బోల్డన్ని థియేటర్లనూ ఆయన కనుసన్నల్లో నడుపుతున్నారు. ఏసియన్ లాంటి ఛెయిన్‌ని ప్రభావితం చేయగల దిట్ట.!
ఒక్కమాటలో చెప్పాలంటే తెలుగు సినిమా అంటేనే, దిల్ రాజు. దిల్ రాజు అంటేనే తెలుగు సినిమా. ‘గుంటూరు కారం’ సినిమాకి డిస్ట్రిబ్యూటర్ ఆయన. ‘గుంటూరు కారం’ సినిమాకి అత్యధిక థియేటర్లు ఇచ్చుకుని, ‘హనుమాన్’ సినిమాకి అత్యల్ప థియేటర్లు ఇచ్చాడాయన. ఇచ్చాడు కాదు, ఇప్పించాడు అనొచ్చేమో.!
సినిమాకి సంబంధించి, దాని రేంజ్.. ఆధారంగా ఒప్పందాలు జరుగుతాయి. అందరికీ తెలిసిన విషయమే ఇది. ‘హనుమాన్’కి ప్రీ రిలీజ్ బజ్ అదిరిపోయింది. థియేటర్లూ గట్టిగా పడాలి. కానీ, సంక్రాంతిని మేగ్జిమమ్ క్యాష్ చేసుకోవడానికి, దిల్ రాజు తెరవెనుకాల పెద్ద నాటకమే ఆడారు.
‘హనుమాన్’ మేకర్స్ ఏడ్చినంత పని చేశారు. అంతలా బాధపడ్డారు మరి. హనుమాన్ కటౌట్ ఓ థియేటర్‌ దగ్గర నిలబెట్టాల్సి వుండగా, ఆ థియేటర్లో సినిమా వేయకుండా, కటౌట్‌ని రోడ్డు పక్కన పడేశారు. ఇన్ని అవమానాలు భరించిన ‘హనుమాన్’ సూపర్ హిట్ అయ్యింది. ఇప్పుడేమో, కాకమ్మ కథలు చెబుతున్నాడు దిల్ రాజు.
పరిశ్రమ పెద్దల్లో ఒకడయ్యాడు కదా, అందుకే దిల్ రాజుని ‘హనుమాన్’ టీమ్ సైతం ఇప్పుడేమీ అనలేకపోతోంది. ప్రతి సంక్రాంతికీ దిల్ రాజు చుట్టూ ఏదో ఒక పంచాయితీ. ఈ విషయాన్ని ఆయనే చెప్పుకుంటున్నాడు. పదే పదే పంచాయితీ పెట్టుకోవడం ఎవరికి అవసరం.? ఎవరికీ ఆ అవసరం లేదు.! దిల్ రాజే, ఆత్మవిమర్శ చేసుకోవాలి. రోజులెప్పుడూ ఒకేలా వుండవ్.!