పవన్ కళ్యాణ్ కంగారులో కూడా మర్యాద ఇవ్వడం మర్చిపోరు : వకీల్ సాబ్ దర్శకుడు

పవర్ స్టార్ పవన్ కళ్యాణ్ ను డైరెక్ట్ చేసే అవకాశం వచ్చిందంటే అది దర్శకులకు బంగారు అవకాశం లాంటిదే. సరిగ్గా వాడుకుంటే బ్లాక్ బస్టర్ తీయొచ్చు. ఇక ఆ అవకాశం పవన్ రీ ఎంట్రీ చిత్రం ద్వారా వస్తే.. ఆ చిత్రంపై ఎంత బజ్ ఉంటుందో ప్రత్యేకించి చెప్పాల్సిన పనిలేదు. దర్శకుడు వేణుశ్రీరాం కు అలాంటి అవకాశమే వచ్చింది. పవన్ రీ ఎంట్రీ చిత్రంగా పింక్ రీమేక్ వకీల్ సాబ్ ను తెరకెక్కిస్తున్నాడు దర్శకుడు వేణుశ్రీరాం. మాములుగా అయితే ఈ పాటికి సినిమా విడుదల జరిగిపోయి నెల రోజులు అయ్యుండేది. అయితే కరోనా కారణంగా షూటింగ్ లు ఆలస్యమయ్యాయి. మరో నెల రోజుల్లో షూటింగ్ లకు అనుమతులు వచ్చే అవకాశాలు ఉన్నాయి. వీలైనంత తొందర్లో సినిమాను విడుదలకు సిద్ధం చేయాలని వకీల్ సాబ్ టీమ్ అనుకుంటోంది.

ఇక ఈ చిత్ర విశేషాలను దర్శకుడు ఒక ఇంటర్వ్యూలో పంచుకున్నారు. ఒకరోజు దిల్ రాజుతో కలిసి త్రివిక్రమ్ శ్రీనివాస్ వద్దకు వెళ్లాను. అప్పుడు వాళ్ళిద్దరి మధ్య పింక్ సినిమా టాపిక్ వచ్చింది. అయితే అదే చిత్ర రీమేక్ ను నేను డైరెక్ట్ చేస్తానని అప్పుడు ఊహించలేదు. మొదట ఈ చిత్రానికి త్రివిక్రమ్ శ్రీనివాస్ స్క్రిప్ట్ విషయంలో వర్క్ చేయాల్సింది. అయితే ఆయన అల వైకుంఠపురములో సినిమాతో ఫుల్ బిజీగా ఉండడంతో కుదర్లేదు.

ఇక పవన్ కళ్యాణ్ తో పనిచేయడం ఒక మర్చిపోలేని అనుభూతి. కంగారులో కూడా గారు అని సంబోధించడం మరిచిపోరు. ఒక మంచి విషయాన్ని పేరున్న హీరో చెబితే దాని రీచ్ వేరుగా ఉంటుంది. వకీల్ సాబ్ తో మనం చూడబోయేది అదే. పవన్ తో పనిచేయడాన్ని ఆస్వాదిస్తున్నా. ఎప్పుడూ సెట్లో నవ్వుతూ సరదాగా గడిపే వ్యక్తి పవన్. సెట్ లో మొదటి రోజే ఆయనతో పనిచేసాను అని చెప్పుకొచ్చాడు వేణుశ్రీరాం.