రివర్స్‌ గేర్‌: వల్లభనేని వంశీకి ఇది మామూలే

సొంత పార్టీలో కుంపటి రాజేయడమెలాగో వల్లభనేని వంశీకి బాగా తెలుసు. విజయవాడ ఎంపీగా టిక్కెట్‌ తెచ్చుకోవడం, గన్నవరం అసెంబ్లీ టిక్కెట్‌ సంపాదించుకోవడం.. గన్నవరం నుంచి ఎమ్మెల్యేగా రెండు సార్లు గెలవడం.. ఇలా అన్ని సందర్భాల్లోనూ ఆయన రాజకీయంగా ‘వ్యూహాత్మకమైన ఎత్తుగడలు’ వేస్తూనే వున్నారు.

ప్రతిసారీ ఈ ఎత్తుగడలకు పార్టీ అధినేత నారా చంద్రబాబునాయుడు తలొగ్గుతూనే వుండాల్సి వస్తోంది. టీడీపీ సీనియర్‌ నేతలు సైతం వల్లభనేని వంశీ వ్యూహాలకు షాకవుతుంటారు. తాజాగా, బీజేపీ నేత సుజనా చౌదరితో మంతనాలు జరిపి, వైసీపీ అధినేత వైఎస్‌ జగన్‌ వద్దకు వెళ్ళిన వల్లభనేని వంశీ.. రాజకీయ వర్గాల్లో అనేక పుకార్లకు తావిచ్చారు.

చివరికి రాజకీయాల నుంచి తప్పుకుంటున్నట్లు ప్రకటిస్తూ ఎమ్మెల్యే పదవికీ, టీడీపీకీ రాజీనామా చేసేశారు. కంగారు పడ్డ చంద్రబాబు, వల్లభనేని వంశీ లేఖ పట్ల స్పందించారు. పార్టీని వీడొద్దనీ, ఎమ్మెల్యే పదవికి రాజీనామా చేయొద్దని సూచించారు. తన లేఖపై స్పందించి, అండగా వుంటానని చెప్పినందుకు చంద్రబాబుకి కృతజ్ఞతలు తెలిపారు వల్లభనేని వంశీ.

వైసీపీ నేతలు, అధికారులు తనను రాజకీయంగా ఇబ్బంది పెడుతున్నారన్నది వల్లభనేని వంశీ ఆరోపణ. అలాంటప్పుడు రాజకీయ పోరాటం చేయాల్సింది పోయి, వైసీపీ అధినేత వైఎస్‌ జగన్‌తో మంతనాలు జరపడం టీడీపీ నేతగా వల్లభనేని వంశీకి తగునా? ఆయన రాజకీయాల స్టైలే అలా వుంటుంది.

చంద్రబాబుని బెదరగొట్టడం వల్లభనేని వంశీ ముఖ్య ఉద్దేశ్యం. 23 మంది ఎమ్మెల్యేలు మాత్రమే వున్న టీడీపీకి, వల్లభనేని రాజీనామాతో పెద్ద దెబ్బే తగులుతుంది. చంద్రబాబు బెదిరిపోతారు. ఆ సంగతి వల్లభనేని వంశీకి తెలుసు. మొత్తమ్మీద, ఈ డ్రామా ఇక్కడితో మగిసిపోతుందా.? కొత్త మలుపులు తిరుగుతుందా.? ఏమో, వేచి చూడాల్సిందే.