టిబి స్పెషల్: ‘కవలలు’.. తెలుగు సినిమా హిట్ ఫార్ములా..! నేడు అంతర్జాతీయ ట్విన్స్ డే

అన్నదమ్ములు, అక్కా చెల్లెళ్లు, అన్నా చెల్లెళ్లు, అక్కా తమ్ముళ్లు.. ఒక కుటుంబంలో తోడబుట్టిన వారి మధ్య ఉండే ఆత్మీయత అనురాగాలు వినేందుకే కాదు.. చూసేందుకు కూడా చూడముచ్చటగా ఉంటాయి. వీటిలో ‘కవలలు’ బంధం మరింత ప్రత్యేకం. ఒకే కాన్పులో జన్మించే వీరి బంధం మరింత అందంగా, ధృడంగా ఉంటుంది. ఇంట్లో కవలలు ఉన్నారంటే ఆ సంబరమే వేరు. ఏ కొందరికో కానీ దక్కని అదృష్టం అది. సినిమాల్లో ఇటువంటి ‘కవలల’ కథాంశాలతో వచ్చిన సినిమాలెన్నో ప్రేక్షకుల్ని అలరించాయి.. సినిమాకు సక్సెస్ ఫార్ములా అయ్యాయి. నేడు.. ఫిబ్రవరి 22 అంతర్జాతీయ కవలల దినోత్సవం సందర్భంగా టాలీవుడ్ లో ప్రేక్షకుల్ని అలరించిన కొన్ని సినిమాలను పరశీలిస్తే..

ముగ్గురు మొనగాళ్లు.. మెగాస్టార్ చిరంజీవి ముగ్గరు అన్నదమ్ములుగా నటించిన ఈ సినిమా 1994లో విడుదలైంది. కె.రాఘవేంద్రరావు దర్శకత్వంలో వచ్చిన ఈ సినిమాలో చిరంజీవి మూడు విభిన్న పాత్రల్లో నటించి మెప్పించారు. కామెడీ, యాక్షన్, సెంటిమెంట్ కథాంశంతో తెరకెక్కిన ఈ సినిమా బాక్సాఫీస్ వద్ద హిట్ సినిమాగా నిలిచింది. నటరాజు దత్తాత్రేయ పాత్రలో చిరంజీవి నటన అద్భుతం.

హలో బ్రదర్.. కింగ్ నాగార్జున అన్నదమ్ములుగా క్లాస్, మాస్ పాత్రల్లో నటించారు. ఈవీవీ సత్యనారాయణ దర్శకత్వంలో తెరకెక్కిన ఈ సినిమా 1994లో విడుదలైంది. నాగార్జున మాస్ పాత్రలో ఎంత కామెడీ పండించారో.. క్లాస్ పాత్రలో అంతే రాణించారు. కవల పిల్లల కథాంశంలో ఎన్నుకున్న పాయింట్ సినిమాకు హైలైట్. కామెడీ, సెంటిమెంట్ ప్రధానాంశాలుగా బ్లాక్ బస్టర్ హిట్ అయిందీ సినిమా.

జీన్స్.. దిగ్గజ దర్శకుడు శంకర్ దర్శకత్వంలో తెరకెక్కిందీ సినిమా. 1998లో విడుదలైన ఈ సినిమాలో తమిళ హీరో ప్రశాంత్ అన్నదమ్ములుగా నటించారు. తండ్రి గా నాజర్, ఆయన కుమారులుగా ప్రశాంత్ కూడా కవలలుగా నటించారు. సినిమా కథాంశమే కవలల చుట్టూ తిరుగుతుంది. ఐశ్వర్యరాయ్ హీరోయిన్ గా నటించిన ఈ సినిమా బాక్సాఫీస్ వద్ద సూపర్ హిట్ అయింది.

అర్జున్.. సూపర్ స్టార్ మహేశ్ బాబు, కీర్తిరెడ్డి కవలలుగా నటించారు. 2004లో వచ్చిన ఈ సినిమాను గుణశేఖర్ తెరకెక్కించారు. కవలల్లో ఉండే ఆత్మీయత, ప్రేమానురాగాలు ఏస్థాయిలో ఉంటాయో ఈ సినిమాలో చాలా హృద్యంగా తెరకెక్కించారు. సెంటిమెంట్ కథాంశంతో తెరకెక్కిన ఈ సినిమా బాక్సాఫీస్ వద్ద హిట్ గా నిలిచింది. రోటీన్ కు భిన్నంగా అమ్మాయి, అబ్బాయిని కవలలుగా చూపారు.

అదుర్స్.. యంగ్ టైగర్ ఎన్టీఆర్ అన్నదమ్ములుగా నటించారు. కవలలుగా ఎన్టీఆర్ రెండు విభిన్నమైన పాత్రల్లో రాణించారు. చారి పాత్రలో ఎన్టీఆర్ నటన, కామెడీ సినిమాకు మేజర్ ఎస్సెట్. కామెడీ, యాక్షన్ కథాంశంతో 2010లో వివి వినాయక్ దర్శకత్వంలో వచ్చిన ఈ సినిమా బాక్సాఫీస్ వద్ద బ్లాక్ బస్టర్ హిట్ సాధించింది.

బ్రదర్స్.. తమిళ నటుడు సూర్య నటించిన ఈ సినిమాలో అవిభక్త కవలల కధాంశంతో తెరకెక్కింది. 2012లో సినిమాటోగ్రాఫర్ కేవీ ఆనంద్ దర్శకత్వంలో తెరకెక్కిన ఈ సినిమా సున్నితమైన కధాంశం, యాక్షన్ ఓరియెంటెడ్ మూవీగా తెరకెక్కింది. బాక్సాఫీస్ వద్ద పర్వాలేదనిపించింది.

జంప్ జిలానీ.. అల్లరోడు అల్లరి నరేశ్ కవలలుగా నటించారు. అల్లరి నరేశ్ మార్క్ కామెడీతో ఈ సినిమా తెరకెక్కింది. సెంటిమెంట్, కామెడీ ప్రధానాంశాలుగా తెరకెక్కిన ఈ సినిమా 2014లో విడదలైంది. ఇ. సత్తిబాబు దర్శకత్వంలో తెరకెక్కిన ఈ సినిమా బాక్సాఫీస్ వద్ద పర్వాలేదనిపించింది.

జై లవకుశ.. యంగ్ టైగర్ ఎన్టీఆర్ మూడు విభిన్నమైన పాత్రల్లో నటించి మెప్పించారు. కామెడీ, సెంటిమెంట్, యాక్షన్ ప్రధానాంశాలుగా ఈ సినిమా తెరకెక్కింది. రావణ పాత్రలో ఎన్టీఆర్ నటన ప్రేక్షకుల్ని ఆకట్టుకుంది. బాబీ దర్శకత్వంలో 2018లో తెరకెక్కిన ఈ సినిమా బాక్సాఫీస్ వద్ద హిట్ గా నిలిచింది. అన్న కల్యాణ్ రామ్ ఈ సినిమాను తెరకెక్కించారు.

వీటితోపాటు ఎన్టీఆర్, ఏఎన్నార్, కృష్ణ, శోభన్ బాబు, వాణిశ్రీ.. ఇలా ఎందరో నటులు కవల కధాంశాలతో సినిమాలు చేసి ప్రేక్షకుల్ని అలరించారు. టాలీవుడ్ సక్సెస్ ఫుల్ ఫైట్ మాస్టర్లు రామ్-లక్ష్మణ్ కూడా కవలలే. కవలలకు బ్రాండ్ అంబాసిడర్లు అనిపించేలా.. ఒకే వర్చస్సుతోపాటు ఒకే డ్రెస్సింగ్ తో ప్రత్యేకంగా కనిపిస్తాను. అంతర్జాతీయ ట్విన్స్ డే సందర్భంగా.. ‘కవలలు’ అందరికీ శుభాకాంక్షలు చెప్తోంది ‘తెలుగు బులెటిన్’.