తెలంగాణ‌లో టిడిపికి షాక్

తెలంగాణ తెలుగుదేశం పార్టీకి ఊహించని షాక్‌ తగిలింది. బలమైన పార్టీ క్యాడర్‌ను కలిగి ఉన్న పార్టీ నేతలు ఒక్కొక్కరుగా పార్టీని వీడుతున్నారు. పార్లమెంటు ఎన్నికలకు టీడీపీ దూరంగా ఉండడంతో రాజకీయ భవితవ్యం కోసం ఆ పార్టీ నేతలు పక్కపార్టీలో చేరాలని నిర్ణయం తీసుకున్నారు.

అందులో భాగంగానే టీఎస్‌- టీడీపీ బీసీ సెల్‌ రాష్ట్ర అధ్యక్షుడు కూన వెంకటేష్‌గౌడ్‌ టీఆర్‌ఎస్‌ కార్యనిర్వాహక అధ్యక్షుడు కేటీఆర్‌ సమక్షంలో గులాబీ కండువా కప్పుకున్నారు. పార్లమెంట్‌ ఎన్నికల్లో పోటీ చేసేది లేదని టీడీపీ రాష్ట్ర కమిటీ స్పష్టం చేసిన నేపథ్యంలో.. గత మూడు, నాలుగు రోజులుగా సమావేశమవుతోన్న నగర నేతలు ఏం చేద్దాం..? అన్న దానిపై చర్చించుకున్నారు.

1982లో హైదరాబాద్‌ గడ్డపైనే టీడీపీ ఆవిర్భవించింది. స్వర్గీయ నందమూరి తారక రామారావు ప్రారంభించిన పార్టీ… ఉమ్మడి రాష్ట్రంలో 16 యేళ్లు అధికారంలో ఉంది. 2004, 2009లో ప్రధాన ప్రతిపక్షంగా వ్యవహరించింది. ఆంధ్రప్రదేశ్‌ విభజన అనంతరం 2014లో జరిగిన ఎన్నికల్లో టీడీపీ-9, మిత్రపక్షం బీజేపీ-5తో కలిపి 14 అసెంబ్లీ స్థానాలతోపాటు మల్కాజ్‌గిరి లోక్‌సభ స్థానాన్ని గెలుచుకుంది.

తెలంగాణ ఏర్పాటు అనంతరం జరిగిన ఎన్నికల్లోనూ పార్టీ గణనీయంగా ఓట్లు సాధించడం టీడీపీ శ్రేణులకు కొత్త ఉత్సాహాన్నిచ్చింది. అనంతరం జరిగిన పరిణామాల నేపథ్యంలో టీడీపీ తరపున గెలిచిన ఎమ్మెల్యేలు, ఎంపీలు టీఆర్‌ఎస్‌లో చేరారు. తాజా పరిణామాల నేపథ్యంలో రాజకీయ భవిష్యత్తు ఏంటి..? అన్న కోణంలో పునరాలోచనలో పడ్డారు.

పార్లమెంట్‌ ఎన్నికల్లో సినిమాటోగ్రఫిశాఖ మంత్రి తలసాని శ్రీనివాస్‌యాదవ్‌ తనయుడు తలసాని సాయికిరణ్‌ యాదవ్‌ బరిలో నిలిచారు. ఈ నేపథ్యంలో ఆపరేషన్‌ ఆకర్ష్‌ను టీఆర్‌ఎస్‌ వేగవంతం చేసింది. టీడీపీ, కాంగ్రెస్‌ నేతలపై వారు దృష్టి సారించారు.

ఇటీవల టీపీసీసీ ప్రధాన కార్యదర్శి పల్లె లక్ష్మణ్‌రావు గౌడ్‌ కేటీఆర్‌ సమక్షంలో టీఆర్‌ఎస్‌లో చేరారు. తాజాగా కూన వెంకటేష్‌గౌడ్‌ కారెక్కారు. అసెంబ్లీ ఎన్నికల సమయంలో సనత్‌నగర్‌ టీడీపీ అభ్యర్థిగా పోటీ చేసి గట్టి పోటీనిచ్చిన ఆయన తలసాని, మాధవరం చొరవతో పార్టీ మారారు. ఇదే దారిలో మరికొందరు నడిచే అవకాశం ఉందని ప్రచారం జరుగుతోంది.

టీడీపీ జిల్లా అధ్యక్షుడు ఎమ్మెన్‌ శ్రీనివాసరావు నియోజకవర్గం నాయకులతో సమావేశమయ్యారు. రాజకీయ భవితవ్యంపై వారితో చర్చించారు. టీడీపీని వీడాలని దాదాపుగా నిర్ణయం తీసుకున్న ఆయన టీఆర్‌ఎస్‌లో చేరాలా..? బీజేపీలోనా..? అన్న దానిపై పార్టీ శ్రేణుల అభిప్రాయం తీసుకున్నట్టు సమాచారం.