సులభ్ కాంప్లెక్స్ దొంగలించి 45వేలకు అమ్మేశారు..! ఎక్కడంటే..

దొంగతనాల్లో విస్తుగొలిపే సంఘటన జరిగింది. ఏకంగా సులభ్ కాంప్లెక్స్ నే దొంగతనం చేశారు. చేసింది దొంగలు కాకుండా ప్రభుత్వోద్యోగంలో ఉన్న ఇంటిదొంగల పని కావడం మరింత ఆశ్చర్యం రేకెత్తిస్తోంది. హైదరాబాద్ లో ఈ సంఘటన జరిగింది. పోలీసులు తెలిపిన వివరాల ప్రకారం.. హైదరాబాద్ లోని మల్కాజిగిరి ప్రాంతంలోని సఫిల్ గూడ చౌరస్తాలోని ఫుట్ పాత్ పై ఉన్న సులభ్ కాంప్లెక్స్ దొంగతనం జరిగింది.

ఈనెల 16వ తేదీ ఉదయం పారిశుద్ద్య కార్మికులు గమనించి ఉన్నతాధికారుల దృష్టికి తీసుకెళ్లారు. అధికారులు పోలీసులకు ఫిర్యాదు చేయడంతో కేసు నమోదు చేసుకుని దర్యాప్తు ప్రారంభించారు. సీసీ ఫుటేజీ ఆధారంగా దొంగతనం చేసింది దోమల్ గూడలో నివసిస్తున్న మెదక్ జిల్లా ఆందోల్ మండలం అమ్మసాగరంకు చెందిన ముప్పారం జోగయ్యగా గుర్తించారు. జోగయ్యను అదుపులోకి తీసుకుని విచారించగా తానే ఈ దొంగతనం చేశానని అంగీకరించాడు.

తనకు జీహెచ్ఎంసీ కేంద్ర కార్యాలయంలో ప్రకటనల విభాగంలో పని చేస్తున్న అరుణ్ కుమార్, జైన్ కన్ స్ట్రక్షన్స్ లో పని చేస్తున్న భిక్షపతి సహకరించారని జోగయ్య అంగీకరించాడు. దొంగతనం చేసిన ఇనుప ఫ్రేమ్ ను తుక్కుగా మార్చి 45వేలకు విక్రయించానని తెలిపాడు. పరారీలో ఉన్న మిగిలిన ఇద్దరి కోసం పోలీసులు గాలిస్తున్నారు.