వీర్రాజు ప్రశ్నాస్త్రం: రైతు ఆత్మహత్యలపై సీఎంని అరెస్ట్‌ చేయగలరా.?

‘ఓ వ్యక్తి ఆత్మహత్యకు సంబంధించి పోలీసుల్ని అరెస్ట్‌ చేస్తారా.? రైతులు ఆత్మహత్యలు చేసుకుంటే, ముఖ్యమంత్రిని అరెస్ట్‌ చేయగలరా.? రాష్ట్రంలో ఓటు బ్యాంకు రాజకీయాలు నడుస్తున్నాయి. టీడీపీ – వైసీపీ కలిసికట్టుగా అడ్డగోలు రాజకీయాలు చేస్తున్నాయి..’ అంటూ కర్నూలు జిల్లాలో ఓ మైనార్టీ వ్యక్తి తన కుటుంబ సభ్యులతో కలిసి బలవన్మరణానికి పాల్పడిన ఘటనపై బీజేపీ ఏపీ అధ్యక్షుడు సోము వీర్రాజు తీవ్రస్థాయిలో వైఎస్సార్‌ కాంగ్రెస్‌ సర్కార్‌పై విరుచుకుపడ్డారు.

కర్నూలు జిల్లాకి చెందిన అబ్దుల్‌ సలాం అనే వ్యక్తిపై పోలీసులు నమోదు చేసిన కేసులు, అబ్దుల్‌ సలాం కుటుంబ సభ్యులకు పోలీసుల వేధింపులు, ఈ క్రమంలో ఆత్మహత్యకు ముందు ఓ సెల్పీ వీడియో తీసి మరీ, ఆ కుటుంబం బలవన్మరణానికి పాల్పడిన ఘటన వెలుగు చూశాక, రాష్ట్రంలో పొలిటికల్‌ హీట్‌ పెరిగిన విషయం విదితమే. ఈ వ్యవహారంపై అటు టీడీపీ, ఇటు వైసీపీ.. బీభత్సమైన పొలిటికల్‌ డ్రామాలు ఆడేస్తున్నాయి. పైకి ఇద్దరూ మైనార్టీల మీద ప్రేమ ఒలకబోసేస్తున్నారు.. తెరవెనుక, మైనార్టీ ఓటు బ్యాంకు కోసం అడ్డగోలు రాజకీయాలు చేస్తున్నారు. ఇక, ఇప్పుడు సీన్‌లోకి బీజేపీ దూసుకొచ్చింది. దాంతో, ‘పొలిటికల్‌ ఆట’ మరింత రసవత్తరంగా మారింది.

ఇదిలా వుంటే, తుంగభద్ర పుష్కరాల విషయంలో రాష్ట్ర ప్రభుత్వం నిర్లక్ష్యంగా వ్యవహరిస్తోందనీ, కరోనా నిబంధనల్ని ఓ పక్క బూచిగా చూపుతూ, ఇంకోపక్క 200 కోట్ల నిధుల్ని కేటాయిస్తామనడం వెనుక తమకు అనుమానాలున్నాయని సోము వీర్రాజు వ్యాఖ్యానించడం గమనార్హం. ‘ఘాట్లను నిర్మించనప్పుడు 200 కోట్ల నిధులు ఎందుకు.?’ అని ప్రశ్నించారు సోము వీర్రాజు. ‘ఓ పద్ధతి ప్రకారం రాష్ట్రంలో అధికార వైసీపీ, ప్రతిపక్షం టీడీపీ రాజకీయాలు చేస్తున్నాయి. ఈ రెండు పార్టీల వైఖరితో ప్రజలు విసిగిపోయారు..’ అంటూ సోము వీర్రాజు తనదైన స్టయిల్లో సెటైర్లు వేశారు.

మిగతా విషయాల సంగతి పక్కన పెడితే, అబ్దుల్‌ సలాం కుటుంబం ఆత్మహత్య ఘటనపై సోము వీర్రాజు ప్రస్తావించిన పాయింట్స్‌ చాలా కీలకమైనవి. ఓ వ్యక్తి ఆత్మహత్య కేసులో పోలీసుల్ని అరెస్ట్‌ చేసినప్పుడు, అమరావతి విషయంలో అలజడికి కారణమైన సీఎం జగన్‌ సహా మంత్రుల విషయమై ఎలాంటి చర్యలుండాలి.? అన్న చర్చ సాధారణ ప్రజానీకంలోనూ వ్యక్తమవుతున్నాయి. అమరావతి ఉద్యమంలో భాగంగా పలువురు రైతులు ప్రాణాలు కోల్పోయిన విషయం విదితమే. వీర్రాజు లాజికల్‌ పాయింట్లు బాగానే వున్నాయిగానీ.. రాష్ట్ర విభజన విషయంలో ఎవర్ని అరెస్ట్‌ చేయాలి.? ప్రత్యేక హోదా విషయంలో ఎవర్ని అరెస్ట్‌ చేయాలి.?