షాకింగ్‌ గాసిప్‌: బూతుల మంత్రి బలిపశువు కాబోతున్నారట.!

చంద్రబాబు పేరు చెబితే పూనకంతో ఊగిపోతారాయన. ‘తప్పతాగి ప్రెస్‌ మీట్ల పెడుతుంటాడు..’ అనే విమర్శలు టీడీపీ నుంచి ఆయన మీదకు దూసుకెళుతుంటాయనుకోండి.. అది వేరే సంగతి. ‘బూతుల మంత్రి’ అనే గుర్తింపు కూడా వుందాయనకి. ‘నేను బూతులు మాట్లాడటం మొదలు పెడితే చంద్రబాబు తట్టుకోగలరా.?’ అంటూ ఆయనే ప్రశ్నిస్తారు.. అంతలోనే, ‘నీ డాష్‌ డాష్‌ చెప్పాడా.?’ అంటూ బూతుల లంకించుకుంటారాయన. సరే, ఆయన వ్యవహారం ఇప్పుడెందుకుంటే, ఈ మధ్య ఆయనలో ‘ఆయాసం’ ఎక్కువైపోతోంది. అవును మరి, ఆవేశం ఎక్కువైతే మిగిలేది ఆయాసమే.! వైఎస్‌ జగన్‌ మెప్పు కోసం చంద్రబాబుని తూలనాడే క్రమంలో ఆయన జనంలో పలచనైపోతున్నానన్న విషయాన్ని మర్చిపోతున్నారు.

తెలివిగా తెలుగుదేశం పార్టీ, ఆ మంత్రిగారి ఓవరాక్షన్‌ని ‘సింపతీ’ కోసం వాడేసుకుంటోందనుకోండి.. అది వేరే విషయం. ఇక, ఇప్పుడు ఈ మంత్రిగారికి సంబంధించి ఓ హాటెస్ట్‌ గాసిప్‌ ఏపీ రాజకీయ వర్గాల్లో హల్‌చల్‌ చేస్తోంది. ‘మంత్రి పదవి ఊడిపోనుందట.. అందుకే ఈ అత్యుత్సాహమట..’ అన్నది ఆ గాసిప్‌ సారాంశం. టీడీపీ నుంచి ఎమ్మెల్యేగా గెలిచి, ఆ తర్వాత జగన్‌ పంచన చేరారాయన.! ఇది చాలాకాలం క్రితం జరిగిన వ్యవహారం. అప్పటినుంచీ ఆయన వైఎస్‌ జగన్‌ విధేయుడిగానే వున్నారు. కానీ, ఏమయ్యిందో.. ఈ మధ్య ‘వ్యవహారం చెడింది’ అందుకే, ఆయన్ని ముఖ్యమంత్రి ‘ఎంటర్‌టైన్‌ చేయడంలేదు’ అని వైసీపీలో ఓ ‘బలమైన సామాజిక వర్గం’ ఆయనకు పొగపెట్టడం షురూ చేసిందట.

అసలే, వైసీపీలో ఓ బలమైన సామాజిక వర్గం, ఇంకో బలమైన సామాజిక వర్గాన్ని అణగదొక్కేస్తోందన్న ప్రచారమూ లేకపోలేదు. ఈ మంత్రిగారు అలా అణగదొక్కేయబడుతున్న సామాజిక వర్గానికి చెందినవారట. ‘ఛ..ఛ.. అంత సీనే లేదు. ఎందుకంటే, ఆయన్ని అలా ప్రోత్సహిస్తున్నది అధిష్టానమే. ఆయనకి ప్రమోషన్‌ వుంటుందేమోగానీ, పదవి నుంచి తొలగించడమన్న ప్రసక్తే వుండదు..’ అంటూ సదరు మంత్రిగారి సన్నిహితులు చెప్పుకుంటున్నారట. ఏమో, రాజకీయాల్లో ఏమైనా జరగొచ్చు. ఒకప్పుడు చంద్రబాబుకి అత్యంత సన్నిహితులైనవారు, ఇప్పుడాయనకు రాజకీయంగా బద్ద శతృవులైపోలేదూ.!