‘బిగ్‌’ హౌస్‌లో మరీ అంత అరాచకమా!

బిగ్‌ బాస్‌ రియాల్టీ షో సీజన్‌ 3 తెలుగులో అతి త్వరలో ప్రారంభం కాబోతోంది. అక్కినేని నాగార్జున హోస్ట్‌గా వ్యవహరించనున్న ఈ షో కోసం ఓ వైపు ఏర్పాట్లు చురుగ్గా సాగుతోంటే, ఇంకో వైపు ఈ షో మీద పెద్దయెత్తున విమర్శలు షురూ అవుతున్నాయి. సీనియర్‌ జర్నలిస్ట్‌ శ్వేతా రెడ్డి, తనను బిగ్‌ బాస్‌ నిర్వాహకులు మోసం చేశారంటూ మీడియాకెక్కి సంచలన ఆరోపణలు చేసిన విషయం విదితమే.

మరోపక్క, రెండో సీజన్‌ కంటెస్టెంట్‌ అయి వుండాల్సిన ఓ సెలబ్రిటీ, ఏకంగా ‘సెక్స్‌’ విషయమై ఆరోపణలు చేయడం గమనార్హం. ‘100 రోజులు హౌస్‌లో సెక్స్‌ లేకుండా వుండగలరా.?’ అని నిర్వాహకులు ప్రశ్నించారనీ, అంతటి జుగుప్సాకరంగా నిర్వాహకులు మాట్లాడేసరికి, ఆ షోకి వెళ్ళకూడదనే నిర్ణయానికి వచ్చానని సదరు కంటెస్టెంట్‌ పేర్కొన్నారు. ఆమె ఎవరో కాదు, ‘ఫిదా’ సినిమాలో నటించిన గాయత్రి గుప్తా. అయితే, ఇలాంటి ఆరోపణలన్నీ షో మీద హైప్‌ పెంచడానికేనని ఇంకో వాదన కూడా వుంది.

గతంలో, బిగ్‌బాస్‌కి వ్యతిరేకంగా ఇలాంటి రచ్చని చాలానే చూశాం. ఆ సంగతి పక్కన పెడితే, బిగ్‌ బాస్‌ రియాల్టీ షో మీద కామన్‌గా వచ్చే విమర్శ ఒకటుంది. అదేంటంటే, రోజులో 24 గంటలు వుంటే, అందులో కేవలం తమక్కావాల్సింది మాత్రమే నిర్వాహకులు చూపిస్తారని. దాంతో, గెలిచే అవకాశాలున్నవారు ఓడిపోవడం.. ఓడిపోతారనుకున్నవారు ఎక్కువకాలం హౌస్‌లో వుండడం జరుగుతోందని హౌస్‌లోకి వెళ్ళి వచ్చినవారూ ఆరోపిస్తున్నారు. దీన్ని పెద్ద తప్పిదంగానో, నేరంగానో చూడాల్సిన పనిలేదు.

అంతిమంగా, అదొక కమర్షియల్‌ ప్రోగ్రామ్‌. రేటింగ్స్‌ కోసం ఇలాంటి ఫీట్లు చేయడం రియాల్టీ షోలకు మామూలే. ఓ కామెడీ ప్రోగ్రామ్‌ని పాపులర్‌ చేసేందుకు యాంకర్‌కీ, కంటెస్టెంట్‌ అయిన కామెడీ నటుడికీ మధ్య లింకు పెట్టి, పండగ చేసుకుంది ఓ ఛానల్‌. ఆ రూమర్‌ చుట్టూ బయట రచ్చ జరుగుతోంటే, ఆ రూమర్‌నే బేస్‌ చేసుకుని చాలా ప్రోగ్రామ్స్‌ని నడిపేస్తున్నారు ‘ఇడియట్‌ బాక్స్‌’లో. సో, బిగ్‌ హౌస్‌లో మరీ అంత అరాచకం వుండకపోవచ్చుగానీ, కొంతమేర వుండొచ్చన్నది మెజార్టీ అభిప్రాయం.