‘సరిలేను నీకెవ్వరు’పై ఎందుకింత నెగెటివిటీ..

సూపర్‌ స్టార్‌ మహేష్‌బాబు హీరోగా నటించిన ‘సరిలేరు నీకెవ్వరు’ ఈ సంక్రాంతికి థియేటర్లలో ఓ రేంజ్‌లో సందడి చేసిన విషయం విదితమే. ఆ సందడి ఇంకా కొనసాగుతూనే వుంది. నిన్ననే ‘సరిలేరు నీకెవ్వరు’ సక్సెస్‌ ఈవెంట్‌ జరిగింది. 100 కోట్ల క్లబ్‌లోకి ‘సరిలేరు నీకెవ్వరు’ చేరిందంటూ అధికారికంగా ప్రకటించేశారు కూడా. మరోపక్క, సంక్రాంతి సెలవులు ముగుస్తున్నా, మళ్ళీ వీకెండ్‌ స్టార్ట్‌ అవడంతో.. వసూళ్ళు పుంజుకుంటున్నాయి. రేపు కూడా ఈ జోరు కొనసాగుతుంది. సోమవారం అసలు సిసలు పరీక్ష ఎదురుకానుంది ‘సరిలేరు నీకెవ్వరు’ సినిమాకి.

సంక్రాంతి సీజన్‌ కలిసి రావడం, తొలి రోజు హిట్‌ టాక్‌ రావడం.. ఇవన్నీ ‘సరిలేరు నీకెవ్వరు’ సినిమాకి కలిసొచ్చాయి. మహేష్‌బాబుకి వున్న స్టార్‌డమ్‌, సినిమాలోని ఎంటర్‌టైనింగ్‌ కంటెంట్‌, రష్మిక గ్లామర్‌, వీటన్నిటికీ తోడు చాలాకాలం తర్వాత విజయశాంతి నటించిన సినిమా కావడం.. ఇవన్నీ ‘సరిలేరు నీకెవ్వరు’ సినిమాని ఇప్పుడు ఈ రేంజ్‌లో నిలబెట్టాయి.

అయితే, ‘సరిలేరు నీకెవ్వరు’పై సోషల్‌ మీడియాలో చాలా నెగెటివిటీ కన్పిస్తోంది. దానికి కారణం, సినిమా కలెక్షన్ల విషయంలో జరుగుతున్న ప్రచారమే. ఇంకా ‘సరిలేరు నీకెవ్వరు’ బ్రేక్‌ ఈవెన్‌ కాలేదని అంటున్నారు. అదే సమయంలో, సినిమా 100 కోట్లు కలెక్ట్‌ చేయడానికి ఇంకో 20 కోట్ల రూపాయలకుపైగానే దూరంలో వుందన్న ప్రచారమూ జరుగుతోంది.

ఈ మధ్య ప్రతి సినిమాకీ గ్రాస్‌, షేర్‌ వసూళ్ళకు సంబంధించి ఈ తరహా వాదనలు గట్టిగానే విన్పిస్తున్నాయి. ‘అసలుకి కొసరు వేసి’ చూపించడం అనేది సినీ పరిశ్రమలో కొత్త వ్యవహారం కాదు. బాలీవుడ్‌లోనూ, కోలీవుడ్‌లోనూ జరుగుతున్నదే. టాలీవుడ్‌లో అది ఈ మధ్య మరీ ఎక్కువయ్యింది. అందునా, మహేష్‌ సినిమాలు ఈ విమర్శల్ని ఎక్కువగా ఎదుర్కొంటున్నాయి.

జెన్యూన్‌ కలెక్షన్స్‌ గురించి మాట్లాడటం హాస్యాస్పదమే అవుతోంది ఇటీవలి కాలంలో. సో, ‘సరిలేరు నీకెవ్వరు’ నుంచే కాదు, ‘అల వైకుంఠపురములో’ నుంచి కూడా జెన్యూన్‌ కలెక్షన్స్‌ ఆశించలేం. అయితే, ‘అతి’ అనేది పరాకాష్టకు చేరినప్పుడే.. ఈ తరహా వివాదాలు ముదిరి పాకాన పడ్తాయి.. నెగెటివిటీ కూడా పీక్స్‌కి చేరిపోతుంటుంది.