Samantha: దాదాపు నాలుగేళ్ల నిషేధం తర్వాత హీరో విజయ్ నటించిన లియో (Leo) లో తెలుగు, తమిళ, కన్నడ భాషల్లో త్రిష (Trisha) కు డబ్బింగ్ చెప్పారు చిన్మయి (Chinmayi). ఈ సందర్భంగా.. లియో దర్శక, నిర్మాతలకు ధన్యవాదాలు చెప్తూ సోషల్ మీడియాలో పోస్ట్ పెట్టారు చిన్మయి. ఈక్రమంలో హీరోయిన్ సమంత (Samantha) స్పందించారు. చిన్మయి డబ్బింగ్ పై వార్త పబ్లిష్ చేసిన వెబ్ సైట్ లింకును సమంత షేర్ చేస్తూ.. తన ఆనందాన్ని ఫైర్ ఎమోజీతో ఇన్ స్టాలో పోస్ట్ చేశారు.
ఏ మాయ చేసావే.. నుంచి అనేక సినిమాల్లో సమంతకు చిన్మయి డబ్బింగ్ చెప్పారు. అప్పటి నుంచీ వీరిద్దరూ స్నేహితులయ్యారు. సినీ రంగంతోపాటు పలు రంగాల్లో మహిళలపై జరుగుతున్న వేధింపులకు నిరసనగా ప్రారంభమైన ‘మీటూ’ ఉద్యమంలో చిన్మయి తన గళం వినిపించేవారు. ఈక్రమంలో డబ్బింగ్ యూనియన్ ప్రెసిడెంట్ రాధారవి, ప్రముఖ తమిళ గేయ రచయిత వైరముత్తుపై లైంగిక ఆరోపణలు చేశారు. దీంతో సినీ, టెలివిజన్ ఆర్టిస్ట్స్ అండ్ డబ్బింగ్ ఆర్టిస్ట్స్ యూనియన్ చిన్మయిపై నిషేధం విధించింది.