కేంద్రం చేసిన అప్పు ముందు ఏపీ అప్పు ఎంత?

అవతలి వాడు పెద్ద తప్పు చేశాడు.. ఆ తప్పు ముందు నేను చేసిన తప్పు ఎంత అన్నట్లుగా ఉంది సజ్జల రామకృష్ణ మాటలు. కేంద్రం ఇప్పటి వరకు రూ.116 లక్షల కోట్లను అప్పుగా తీసుకు వచ్చింది. కేంద్రం తీసుకు వచ్చిన అప్పు ముందు ఏపీ తీసుకు వచ్చిన అప్పు ఎంత అంటూ సజ్జల ప్రశ్నించాడు. ఇటీవల ఏపీ ప్రభుత్వం తీసుకు వస్తున్న అప్పులు మరియు ఆర్థిక ఇబ్బందుల గురించి సోషల్‌ మీడియాలో పెద్ద ఎత్తున వార్తలు వస్తున్నాయి. ఈ నేపథ్యంలో ఆయన మీడియా ముందుకు వచ్చి పై విధంగా వివాదాస్పదన వ్యాఖ్యలు చేశాడు.

సీఎం జగన్‌ లాంటి బలమైన నేతను దెబ్బ తీయాలనే ఉద్దేశ్యంతో కొందరు చేస్తున్న ప్రయత్నాలను వైకాపా నాయకులు మరియు ప్రజలు ఖచ్చితంగా ఎదుర్కొంటారు అంటూ పేర్కొన్నారు. గతంలో ప్రభుత్వాలు.. ఇతర రాష్ట్రాలు ఏవీ కూడా అప్పులు చేయనట్లుగా విపక్ష పార్టీలు విమర్శలు చేస్తున్నాయి. గతంలో ఉన్న ప్రభుత్వాలు ఎన్నో దేవాలయాలను కూల్చి వేశారు. కాని ఇప్పుడు వైకాపా ప్రభుత్వం ఆ ఆలయాలను పునః ప్రారంభిస్తుంది. అలాంటి వైకాపా ప్రభుత్వం పై బీజేపీ విమర్శలు చేయడం వారి విజ్ఞతకే వదిలేస్తున్నాం అంటూ సజ్జల వ్యాఖ్యలు చేశారు.