ఎట్టకేలకు ప్రభాస్ నటించిన ‘సాహో’ సినిమా 400 కోట్ల క్లబ్లో చేరింది. ఇది గ్రాస్ లెక్క. సినిమా డిజాస్టర్ టాక్ వచ్చినా, ఈ స్థాయిలో గ్రాస్ లెక్కలు ఖాయమని ముందే అంచనా వేశారు ట్రేడ్ పండితులు. ఆ అంచనాల ప్రకారమే సాహో, 400 కోట్ల క్లబ్లోకి చేరినా, నష్టాలు భారీగా వుండబోతున్నాయన్నది తాజా అంచనాల సారాంశం. మొత్తంగా 40 శాతానికి పైగానే నష్టాలు వుంటాయని ఓ ట్రేడ్ పండితుడు అంచనా వేస్తున్నాడు.
తొలి రోజే డిజాస్టర్ టాక్ రావడం, ఆ తర్వాత సినిమా పబ్లిసిటీని దాదాపుగా అటకెక్కించేయడంతో ‘సాహో’ పూర్తిగా పడకేసేసింది వసూళ్ళ విషయంలో. హీరో ప్రభాస్ మినహా, ఈ సినిమా ప్రమోషన్లో మిగతా ఎవ్వరూ ప్రభావం చూపలేకపోయారన్నది నిర్వివాదాంశం. ప్రభాస్కి వున్న ‘డార్లింగ్’ ఇమేజ్ కొంతవరకు ఈ సినిమాని ఇప్పటిదాకా నిలబెట్టిందని సగటు సినీ విశ్లేషకుడు అభిప్రాయపడుతున్నాడు.
Also Read: రిజల్ట్ : సాహో ఫ్లాప్ కానీ .. ప్రభాస్ పాస్ ?
మరోపక్క, ‘సాహో’ ఓవర్సీస్ వసూళ్ళలో 3 మిలియన్ మార్క్ చాలా కష్టంగా దాటింది. కానీ, అక్కడా నష్టాలు తప్పవని ఇప్పటికే తేలిపోయింది. సెకెండ్ వీకెండ్ కూడా ముగిసిపోవడంతో ‘సాహో’ ఇకపై బాక్సాఫీస్ వద్ద పెద్దగా పైసల్ రాబట్టే అవకాశాలు కన్పించడంలేదు. శని, ఆది వారాల్లో జస్ట్ ‘మమ’ అన్పించిన ‘సాహో’, ఈ రోజు మరీ దారుణంగా స్టార్ట్ అయ్యిందని ఎర్లీ ట్రేడ్ రిపోర్ట్స్ (ఈ రోజుకి సంబంధించి) చెబుతున్నాయి.
సుజీత్ దర్శకత్వంలో సుమారు 300 కోట్ల బడ్జెట్తో ‘సాహో’ తెరకెక్కిన విషయం విదితమే. తెలుగు వెర్షన్ సైతం 100 కోట్ల క్లబ్లో చేరే అవకాశం (షేర్) పరంగా కన్పించడంలేదు. తెలుగుతో పోల్చితే, హిందీలోనే కాస్త బెటర్ రిజల్ట్ వచ్చిందని ట్రేడ్ వర్గాలు అంటున్నాయి. ఇదిలా వుంటే, ‘సాహో’ తాజా పోస్టర్, అభిమానుల్ని కొంత ఉత్సాహపరుస్తోంది. జెట్ ప్యాక్ వేసుకున్న ప్రభాస్, హాలీవుడ్ హీరోలా కన్పిస్తున్నాడు ఈ పోస్టర్లో.