వర్మ మరో దుమారం.. శశికళ !

సంచలనాలకు మారుపేరుగా నిలిచిన రామ్ గోపాల్ వర్మ .. ఇప్పటికే ”లక్ష్మిస్ ఎన్టీఆర్” పేరుతొ సినిమా చేసి పెద్ద దుమారమే రేపాడు. ఎన్టీఆర్ జీవితంలో జరిగిన రెండు ముఖ్య సంఘటనలు .. ఒకటి లక్ష్మి పార్వతి అయన జీవితంలోకి ఎంట్రీ కావడం .. రెండు చంద్రబాబు వెన్నుపోటు అంశాలను ప్రధానంగా తీసుకుని, ఇది కుటుంబ కుట్రల కథ అంటూ తెరకెక్కించిన ”లక్ష్మిస్ ఎన్టీఆర్” ఇటీవలే ఒక్క ఆంధ్రా లో తప్ప అంతటా విడుదలై సంచలనం రేపింది.

సినిమా విడుదలకు ముందున్న క్యూరియాసిటీ .. విడుదల తరువాత తగ్గింది. దానికి కారణం లేకపోలేదు .. లక్ష్మిస్ ఎన్టీఆర్ సినిమా కేవలం లక్ష్మి పార్వతి కోణంలోనే తీశారన్న ప్రచారం జరుగుతుంది. ఈ విషయం పక్కన పెడితే .. తన నెక్స్ట్ సినిమా గురించి అప్పుడే ప్రకటించేశాడు వర్మ.

ఈ సారి ఆయన ఫోకస్ తమిళనాడు పై పడింది. మాజీ ముఖ్యమంత్రి జయలలిత ప్రియనేస్తం శశికళ జీవిత కథతో సినిమా చేస్తానంటూ సోషల్ మీడియా లో శశికళ పేరుతొ ఓ పోస్టర్ పెట్టేసి .. నెక్స్ట్ సినిమా ఇదే అంటూ ప్రకటించేశాడు. ప్రేమ ప్రమాదకరమైన రాజకీయం అంటూ దానికి ట్యాగ్ కూడా పెట్టేసారు. పైగా ఈ ప్రాజెక్టు ను ప్రకటించడం చాలా సంతోషంగా ఉందంటూ పేర్కొన్నాడు వర్మ.

మనసంటూ లేని కఠినాత్ములు , జైళ్లు, మన్నార్ గుడి గ్యాంగ్స్ కు వ్యతిరేకంగా అల్లుకున్న ఓ బంధం కథ ఇది అంటూ కామెంట్ పెట్టాడు. ప్రస్తుతం వర్మ విడుదల చేసిన పోస్టర్ ఇప్పుడు పెద్ద దుమారమే రేపుతోంది. అన్నట్టు ఈ చిత్రాన్ని ఆంధ్రప్రదేశ్ లో తప్ప అంతటా విడుదల చేస్తానంటూ ప్రకటించాడు. ప్రస్తుతం శశికళ సినిమా అనగానే తమిళనాడు రాజకీయాల్లో ప్రకంపనలు క్రియేట్ అవుతున్నాయి.

ఈ సినిమాలో ఎవరి జాతకం గురించి బయటపెడతాడో అంటూ చర్చలు జరుగుతున్నాయట. జయతో ఎంతో అనుబంధం ఉన్న శశికళ జయ మరణం తరువాత రాజకీయ సమీకరణ చేసి ముఖ్యమంత్రి కావాలని ప్లాన్ వేసింది . కానీ దానికి తమిళనాడు జనాలు ఒప్పుకోలేదు పైగా, ఆమె పై ఉన్న కేసులను బయటికి తేవడమే శశికళ ప్రస్తుతం జైలు శిక్ష అనుభవిస్తున్న విషయం తెలిసిందే. మొత్తానికి శశికళ తో మరో సంచలనాన్ని ప్రకటించిన వర్మ … ఈ సినిమా విషయంలో ఇంకెంత దుమారం రేపుతాడో చూడాలి !!