రాహుల్‌ సిప్లిగంజ్‌ ‘బిగ్‌’ ఫాలోయింగ్‌ వెనుక..

సోషల్‌ మీడియాలో రాహుల్‌ సిప్లిగంజ్‌ ‘సైన్యం’ ఓ రేంజ్‌లో ప్రభంజనం సృష్టించేస్తోంది. బిగ్‌ బాస్‌ రెండో సీజన్‌ విన్నర్‌ కౌశల్‌ మండా కోసం ఏర్పడిన ‘కౌశల్‌ ఆర్మీ’ తరహాలో, గత కొద్ది రోజులుగా రాహుల్‌ అభిమానులు హల్‌చల్‌ చేస్తున్నారు. ‘కౌశల్‌ ఆర్మీతో పోల్చొద్దు..’ అంటూ కౌశల్‌ ఆర్మీ తరఫున, రాహుల్‌ అభిమానులకు వార్నింగ్స్‌ కూడా వెళుతుండడం గమనార్హం. అయితే, రాహుల్‌ సిప్లిగంజ్‌కి అనూహ్యంగా ఈ స్థాయిలో పాపులారిటీ పెరడం వెనుక బలమైన కారణాలే వున్నాయి.

మొదట్లో ‘కంటెస్టెంట్‌కి వుండాల్సిన కనీస అర్హతల్లేవ్‌..’ అనే విమర్శల్ని ఎదుర్కొన్న రాహుల్‌.. నిజానికి పాపులర్‌ సెలబ్రిటీనే. చాలా మ్యూజిక్‌ వీడియోస్‌ చేశాడు రాహుల్‌ సిప్లిగంజ్‌. ఆ విషయాన్ని పక్కన పెడితే, సినిమాల్లో సింగర్‌గా చాలా పాటలు పాడాడు. అన్నిటికీ మించి, పలువురు సినీ ప్రముఖులతో రాహుల్‌కి సన్నిహిత సంబంధాలున్నాయి. ఆ విషయం, సోషల్‌ మీడియా వేదికగా ఆయా సెలబ్రిటీల అభిమానులు స్పందిస్తున్న తీరుని బట్టి అర్థమవుతోంది.

మిగతా విషయాలన్నీ ఓ ఎత్తు, రౌడీ హీరో విజయ్‌ దేవరకొండ సపోర్ట్‌ ఇంకోపక్క. ‘రాహుల్‌, మనం కలుసుకున్నాం ఓ ఫంక్షన్‌లో గుర్తుందా.?’ అని పర్టిక్యులర్‌గా రాహుల్‌ని అడిగాడు విజయ్‌. ఇక, తరుణ్‌ భాస్కర్‌ అయితే, రాహుల్‌తో తనకున్న సన్నిహిత సంబంధాల్ని చెప్పుకొచ్చాడు. ‘త్వరగా వచ్చెయ్‌.. పార్టీ చేసుకుందాం..’ అన్నాడు తరుణ్‌ భాస్కర్‌. అంతకు ముందు వీకెండ్‌లో సింగర్‌ నోయెల్‌ సీన్‌, రాహుల్‌ కోసం వస్తూ.. ఓ పాట పాడాడు. అప్పట్లో ఆ పాట పెద్ద సంచలనమే అయ్యింది. అది ఇంకా సోషల్‌ మీడియాలో మార్మోగుతోంది.

బహుశా ఈ స్థాయిలో ఫాలోయింగ్‌ పెరుగుతుందని రాహుల్‌ కూడా ఊహించి వుండడేమో. అన్నట్టు, ఇదంతా ఓ స్క్రిప్ట్‌ ప్రకారమే జరుగుతోందా.? అన్న అనుమానాలు రాహుల్‌ ప్రత్యర్థుల అభిమానుల నుంచి వ్యక్తమవుతుండడం గమనార్హం.