వైసీపీ విషయంలో రమణ దీక్షితులు రివర్స్‌ గేర్‌.?

గత కొంత కాలంగా టీటీడీలో జరుగుతున్న పరిణామాల పట్ల ఒకింత అసహనం వ్యక్తం చేస్తున్నారు రమణ దీక్షితులు. చంద్రబాబు హయాంలో రమణ దీక్షితులు వ్యవహారం హాట్‌ టాపిక్‌గా మారిన విషయం విదితమే. టీటీడీ ప్రధాన అర్చకులుగా, ఆగమ శాస్త్ర సలహాదారుగా ఆయన బాధ్యతలు నిర్వహిస్తున్న సమయంలో ఆయన తొలగింపు వ్యవహారం పెను సంచలనం సృష్టించింది. ఈ నేపథ్యంలో ఆయన అప్పటి ప్రతిపక్ష నేత వైఎస్‌ జగన్‌ మోహన్‌రెడ్డిని కలవడం, అప్పటి ముఖ్యమంత్రి చంద్రబాబుపై సంచలన ఆరోపణలు చేయడం తెల్సిన విషయాలే.

వైసీపీ అధికారంలోకి వస్తూనే, రమణ దీక్షితులుకి తిరిగి టీటీడీలో సముచిత స్థానం లభించింది. ఆ తర్వాత ఆయన కొంతకాలం పాటు ఎలాంటి వివాదాల జోలికీ వెళ్ళలేదు. అయితే, ఆ మధ్య టీటీడీ భూముల అమ్మకం, లడ్డూ విక్రయాలు సహా పలు అంశాలపై రమణ దీక్షితులు సంచలన వ్యాఖ్యలు చేసి, వార్తల్లోకెక్కారు. ‘అప్పటి టీడీపీ ప్రభుత్వ హయాంలోని పరిస్థితులకీ, ఇప్పటి వైసీపీ ప్రభుత్వ హయాంలోని పరిస్థితులకీ పెద్దగా సానుకూల మార్పులేమీ జరగలేదు. టీటీడీలో పరిణామాలు ఏమంత బాగా లేవు.. ముఖ్యమంత్రిని ఎవరో తప్పుదోవ పట్టిస్తున్నారు..’ అంటూ రమణ దీక్షితులు ఆరోపించడం అప్పట్లో పెను సంచలనంగా మారింది.

తాజాగా, టీటీడీపై ప్రభుత్వ పెత్తనం వుండకూడదంటూ బీజేపీ నేత సుబ్రహ్మణ్యస్వామి చేసిన వ్యాఖ్యల్ని సమర్థిస్తూ సోషల్‌ మీడియా వేదిగాక స్పందించారు. ఎవరు ఔనన్నా ఎవరు కాదన్నా, టీటీడీ అంటే రాజకీయ నిరుద్యోగులకు పునరావాస కేంద్రం.. అనే భావన చాలాకాలంగా బలపడిపోయింది. అందుక్కారణం, రాజకీయ పార్టీలు టీటీడీ చుట్టూ రాజకీయాలు చేయడం, అధికారంలో వున్నవారు.. టీటీడీలో కీలక పదవుల విషయంలో వివాదాస్పద నిర్ణయాలు తీసుకోవడమే. ఇక, ‘పింక్‌ డైమండ్‌’ సహా పలు విషయాల్లో చంద్రబాబు సర్కార్‌పై సంచలన ఆరోపణలు చేసిన రమణ దీక్షితులు, ఇప్పుడు వైసీపీ ప్రభుత్వంపైనా అదే తరహా తీరు ప్రదర్శించబోతున్నారా.? అన్న చర్చ జరుగుతోంది.

బీజేపీ పెద్దలతో ఇప్పుడు రమణ దీక్షితులు టచ్‌లో వున్నారనీ, ఈ కారణంగానే ఆయన ‘రివర్స్‌ గేర్‌’ జగన్‌ విషయంలో వేశారనీ రాజకీయ వర్గాల్లో గుసగుసలు విన్పిస్తున్నాయి.