పవన్‌ కళ్యాణ్‌కి వెన్ను నొప్పి.. అసలు కారణమేంటి.?

జనసేన అధినేత పవన్‌ కళ్యాణ్‌ వెన్ను నొప్పితో బాధపడుతున్నారు. ఇది ‘గబ్బర్‌ సింగ్‌’ సినిమా సమయంలో తగిలిన గాయం తాలూకు ఎఫెక్ట్‌. అప్పటినుంచీ తరచూ పవన్‌ కళ్యాణ్‌ వైద్య చికిత్స పొందుతూనే వున్నారు. సర్జరీ తప్పనిసరి.. అని డాక్టర్లు పలుమార్లు సూచించినా, పవన్‌ కళ్యాణ్‌ సంప్రదాయ వైద్య విధానాలవైపే మొగ్గు చూపుతున్నారు. ఈ విషయాన్ని పవన్‌ కళ్యాణ్‌, ఓ ప్రెస్‌ నోట్‌ ద్వారా వెల్లడించారు.

మామూలుగా అయితే, తన అనారోగ్య సమస్యల గురించి పవన్‌ ఎప్పుడూ ఎక్కడా చెప్పింది లేదు. కానీ, విషయం ఇక్కడ అలాంటిది. విజయవాడలో మీడియా స్వేచ్ఛపై రౌండ్‌ టేబుల్‌ సమావేశాన్ని ప్లాన్‌ చేశారు. ఈ సమావేశానికి పవన్‌ కళ్యాణ్‌ హాజరు కావాల్సి వుంది. ఆంధ్రప్రదేశ్‌లో ప్రస్తుతం రెండు మీడియా సంస్థలపై అనధికారిక బ్యాన్‌ కొనసాగుతున్న విషయం విదితమే. అధికార పార్టీకి చెందిన నేతలు (మంత్రులు) ఇచ్చిన ఆదేశాలతో ఆ రెండు న్యూస్‌ ఛానళ్ళ ప్రసారాల్ని నిలిపేశారు. దాంతో గత కొంద్ది రోజులుగా రచ్చ జరుగుతోంది.

అయితే, సదరు మీడియా సంస్థలు పవన్‌ కళ్యాణ్‌ విషయంలో గతంలో అత్యుత్సాహం ప్రదర్శించాయి.. కుట్రపూరితంగా వ్యవహరించాయి. ఓ దశలో, ఓ ఛానల్‌పై పవన్‌ కళ్యాణ్‌ యుద్ధం ప్రకటించాల్సి వచ్చింది కూడా. అయితే, మీడియాలో తమకు వ్యతిరేకంగా కథనాలు రాసినప్పుడు వాటికి వ్యతిరేకంగా పోరాటం చేయడమే కాదు, సదరు మీడియా సంస్థలకు సంబంధించి ఇబ్బందికరమైన పరిస్థితులు ఎదురైనప్పుడు, వారికి బాసటగా కూడా నిలిచారు పవన్‌ కళ్యాణ్‌.

సాయాన్ని మర్చిపోయి మరీ, పవన్‌ కళ్యాణ్‌పై బురద జల్లడం సదరు మీడియా సంస్థలకి అలవాటే. ఇప్పుడు పవన్‌ కళ్యాణ్‌ వెన్ను నొప్పి వ్యవహారంపైనా సదరు మీడియా సంస్థలకు చెందిన అధినేతలు అసహనం వ్యక్తం చేస్తున్నారట. ‘కుంటి సాకులు చెబుతున్నారు..’ అంటూ సదరు మీడియా సంస్థల అధినేతలు వెటకారం చేస్తుండడం గమనార్హం. ఎన్నికల వేళ తనను ఎంత కించపర్చినా, మీడియాకి అండగా వుంటానంటూ సదరు ఛానల్స్‌ తరఫున మాట్లాడటమే పవన్‌ చేసిన నేరమైపోయినట్లుంది.