పవన్ రెడీ అవుతున్నారు!

ఆంధ్రప్రదేశ్ లో ప్రధాన ప్రతిపక్ష పార్టీగా ఎదిగేందుకు జనసేన అధినేత పవన్ కల్యాణ్ కసరత్తు ప్రారంభించారు. పార్ట్ టైం పొలిటీషియన్ అంటూ తనపై వస్తున్న విమర్శలను తిప్పికొట్టడానికి సన్నద్ధమవుతున్నారు. ప్రకటనలకే కాకుండా ప్రజల్లో ఉండటానికి రెడీ అవుతున్నారు. ప్రజా సమస్యలపై అధికార పార్టీని ప్రశ్నించాలని ఆయన నిర్ణయించుకున్నట్టు పార్టీ వర్గాల ద్వారా తెలిసింది.

ఇటీవల జరిగిన ఎన్నికల్లో జనసేన బొక్కబోర్లా పడిన సంగతి తెలిసిందే. ఆ పార్టీ ఒకే ఒక్క ఎమ్మెల్యేను గెలుచుకోగా, పవన్ పోటీచేసిన రెండోచోట్లా ఓటమి చవిచూశారు. ఈ నేపథ్యంలో ఆయన రాజకీయాలకు గుడ్ బై చెప్పి మళ్లీ సినిమాలు చేసుకుంటారనే ప్రచారం సాగింది. అయితే, వాటిని ఆయన తోసిపుచ్చుతూ.. తాను చివరి వరకు రాజకీయాల్లోనే కొనసాగుతానని స్పష్టంచేశారు. తాజాగా ఏపీలో రైతులు ఎదుర్కొంటున్న సమస్యల్ని ప్రభుత్వం వెంటనే పరిష్కరించాలని కోరుతూ ఓ ప్రకటన విడుదల చేశారు. దీనిపై మిశ్రమ స్పందనలు వ్యక్తమయ్యాయి. ఇలా మొక్కుబడిగా ప్రకటనలు విడుదల చేయడం మాని, ప్రజల్లో ఉండి వారి తరఫున పోరాడాలంటూ పలువురు పేర్కొన్నారు.

ఈ నేపథ్యంలో పవన్ కూడా తన పంథా మార్చాలని డిసైడ్ అయినట్టుగా కనిపిస్తోంది. త్వరలోనే రైతు సమస్యలపై రోడ్డెక్కాలని ఆయన నిర్ణయించుకున్నారని సమాచారం. ప్రస్తుతం రాష్ట్రంలో రైతులు విత్తనాలు, ఎరువుల కొరతతో తీవ్ర ఇబ్బందులు ఎదుర్కొంటున్నారు. వర్షాలు వచ్చే సమయానికి అందుబాటులో ఉండాల్సిన విత్తనాలు.. జూలై మొదలైపోయినా ఎక్కడా దొరకడంలేదు. దీంతో రైతులు ఆందోళన చేస్తున్నారు. ఈ సమస్యను పరిష్కరించాల్సిన ప్రభుత్వం.. ఈ దుస్థితికి కారణం గత టీడీపీ ప్రభుత్వమేనని చెప్పి చేతులు దులిపేసుకుంటోంది.

నిజానికి ప్రభుత్వాన్ని ప్రశ్నించడానికి ఇది చాలా పెద్ద అస్త్రమే. అయితే.. అటు టీడీపీ, ఇటు జనసేన రెండూ ఈ విషయంలో విఫలమయ్యాయి. ఈ నేపథ్యంలో రైతులతో కలిసి ఆందోళనలు చేయడానికి పవన్ సమాయత్తమవుతున్నారని జనసేన వర్గాలు చెబుతున్నాయి. ఏపీ సీఎంగా జగన్ పగ్గాలు చేపట్టి నెల రోజులు పూర్తయినా, ప్రజలకు ఉపయోగపడే ఒక్క కార్యక్రమమూ సక్రమంగా చేయలేదని, ఎంతసేపూ భవనాలు కూల్చివేతలు, చంద్రబాబును జైలుకు పంపడం అనే అజెండా ఒక్కటే అమలు చేస్తున్నారని పవన్ విమర్శిస్తున్నారు.

రాష్ట్రం ఆర్థికంగా తీవ్ర సంక్షోభంలో ఉన్న ప్రస్తుత పరిస్థితుల్లో జగన్ ప్రకటించిన నవరత్నాలకు డబ్బులు ఎక్కడి నుంచి తెస్తారో చెప్పాలని పవన్ డిమాండ్ చేస్తున్నారు. వచ్చే ఐదేళ్లలో జగన్ ప్రభుత్వ వైఫల్యాలను ప్రజల్లోకి తీసుకెళ్లడంతోపాటు ప్రజా సమస్యలపై నిరంతరం పోరాడాలని ఆయన నిర్ణయించుకున్నారని జనసేన వర్గాలు వెల్లడించాయి. దీంతో ప్రధాన ప్రతిపక్షంగా ఉన్న టీడీపీ స్థానాన్ని తాము కైవసం చేసుకోవడం ఖాయమని చెబుతున్నాయి. పవన్ ఈ విషయంలో ఇలాగే ముందుకెళితే ప్రజల్లో ఆయనకు రాజకీయపరమైన ఆదరణ పెరుగుతుందనడంలో ఎలాంటి సందేహమూ ఉండదు.