నెల్లూరు బులుగు నాటకం.! ఈ రాజకీయం ఎవరి కోసం.?

నెల్లూరు జిల్లా వేదికగా అధికార వైసీపీలో చిత్ర విచిత్రమైన రీతిలో ‘రాజకీయ నాటకం’ నడుస్తోంది. వైసీపీకే చెందిన ఇద్దరు కీలక నేతలు, విడివిడిగా సమావేశాలు పెట్టుకున్నారు. ఒకరేమో తాజా మాజీ మంత్రి.. ఇంకొకరేమో తాజా మంత్రి. ఇద్దరి మధ్యా చాలాకాలంగా ఆధిపత్య పోరు నడుస్తోంది.!

‘రెండింతలు తిరిగిచ్చేస్తా..’ అంటూ మంత్రి పదవి పోయాక వైసీపీ నేత అనిల్ కుమార్ యాదవ్, కొత్త మంత్రి కాకాణి గోవర్ధన్ రెడ్డి విషయమై ఆసక్తికరమైన వ్యాఖ్యలు చేశారు. కాకాణికి వ్యతిరేకంగా మరో వైసీపీ ఎమ్మెల్యే కోటంరెడ్డి శ్రీధర్ రెడ్డితోనూ రాజకీయ మంతనాలు ఇటీవల అనిల్ కుమార్ యాదవ్ నడిపిన విషయం విదితమే.

వైసీపీ నేతలు ఆడుతున్న ఈ రాజకీయ నాటకం నెల్లూరు జిల్లా వాసుల్నే కాదు, ఆంధ్రప్రదేశ్ ప్రజలందర్నీ ఆశ్చర్యానికి గురిచేస్తోంది. ఒకే పార్టీలో రెండు కుంపట్లట.. ఒకరికి పోటీగా ఇంకొకరు సమావేశాలట.. ‘రెచ్చగొట్టే వ్యాఖ్యలు చేసుకోవద్దు..’ అంటూ అధిష్టానం ఇద్దర్నీ ఆదేశించడమట. అదిరింది కదూ ఈ బూలుగు నాటకం.

మంత్రి వర్గ పునర్ వ్యవస్థీకరణ నేపథ్యంలో పదవులు కోల్పోయిన మేకతోటి సుచరిత ఎమ్మెల్యే పదవికి రాజీనామా చేయడం ఓ బులుగు డ్రామా. మంత్రి పదవి కోల్పోయిన బాలినేని శ్రీనివాసరెడ్డి వ్యక్తం చేసిన అసంతృప్తి ఇంకో డ్రామా.! వెరసి, మొత్తంగా ఓ హై డ్రామా బులుగు పార్టీ అధినాయకత్వం నుంచి అప్పట్లో నడిచింది. దానికి నెల్లూరు నాటకం ఓ కొనసాగింపు మాత్రమే.

చిత్రమేంటంటే ఈ మొత్తం వ్యవహారంలో టీడీపీ అనుకూల మీడియా హంగామా చేయడం. అంటే, ఆ నాటకానికి పచ్చ బ్యాచ్ డప్పులు మోగిస్తోందన్నమాట. చివరికి అంతా తుస్సుమనడం ఖాయం.