సై’కిల్‘కి యంగ్ టైగర్ ఎన్టీఆర్ రిపేర్ చేయగలడా?

ఈ రోజుల్లో సినీ నటులు రాజకీయ పార్టీ పెట్టడమో, రాజకీయ పార్టీని నడపాల్సి రావడమో అంటే చేతులు కాల్చుకోవడం కిందే లెక్క. ఆ విషయం ఇంకోసారి నిరూపితమయ్యింది. మెగాస్టార్‌ చిరంజీవి ప్రజారాజ్యం పార్టీని స్థాపించి చెప్పుకోదగ్గ సీట్లు, ఓట్లు సాధించినా, అధికారంలోకి రాలేకపోయారు.. రాజకీయాల్లో ఎక్కువ కాలం మనుగడ సాధించలేకపోయారు. జనసేన అధినేత పవన్‌కళ్యాణ్‌ పరిస్థితి మరీ దారుణం. పోటీ చేసిన రెండు చోట్లా ఓడిపోయారాయన. గుడ్డిలో మెల్ల అన్నట్లు జనసేన నుంచి ఒక్క అభ్యర్థి మాత్రమే ఎమ్మెల్యేగా గెలిచారు తాజా ఎన్నికల్లో. ఇలాంటి పరిస్థితుల్లో యంగ్‌ టైగర్‌ ఎన్టీఆర్‌, ‘పార్టులు ఊడిపోయిన’ సైకిల్‌ పార్టీని రిపేర్‌ చేయగలడా?

తెలుగుదేశం పార్టీకి కొత్త రధ సారధి కావాలంటూ పార్టీ శ్రేణుల్లో అభిప్రాయాలు పోటెత్తుతున్నాయి. చంద్రబాబుకి వయసు అయిపోయిందనీ, ఆయన నాయకత్వంలో తెలుగుదేశం పార్టీ ఇకపై ముందడుగు వేయలేదని చాలామంది అభిప్రాయపడుతున్నారు. కొందరు నందమూరి బాలకృష్ణకు పార్టీ పగ్గాలు అప్పగించాలని కోరుతోంటే, మరికొందరు యంగ్‌ టైగర్‌కి తెలుగుదేశం పార్టీని చంద్రబాబు అప్పగిస్తే బెటరని అంటున్నారు. జూనియర్‌ ఎన్టీఆర్‌ అభిమానులు మాత్రం తమ అభిమాన హీరో ‘రాజకీయ మరక’ అంటించుకోకపోవడమే మంచిదని భావిస్తుండడం గమనార్హం. అయితే, ఆ అభిమానుల్లోనూ కొందరు తమ అభిమాన హీరోని రాజకీయ తెరపై చూడాలని కోరుకుంటుండడం ఇంకా ఆసక్తికరమైన అంశం.

తెలంగాణ అసెంబ్లీ ఎన్నికల సమయంలో జూనియర్‌ ఎన్టీఆర్‌, కళ్యాణ్‌రామ్‌ల సోదరి నందమూరి సుహాసిని కూకట్‌పల్లి నియోజకవర్గం నుంచి బరిలోకి దిగడం వెనుక చంద్రబాబు ‘కుట్ర’ కోణం అందరికీ తెలిసిందే. హరికృష్ణ కుమార్తెను అక్కడ చంద్రబాబే ఓడించారు. అసలు ఆమె పోటీ చేయకుండా వుండి వుంటే ఇంకోలా వుండేది. టీడీపీ గెలిచేదని కాదు, నందమూరి కుటుంబం తాలూకు గౌరవ మర్యాదల్ని మంటగలిపేసింది ఆ ఎన్నిక. ఆ ఓటమి అంత ఖరీదైనది మరి. సోదరి ఓటమిని ముందే ఊహించినా ఏమీ చేయలేని పరిస్థితి కళ్యాణ్‌రామ్‌, జూనియర్‌ ఎన్టీఆర్‌లది.

తెలుగుదేశం పార్టీ పూర్తిగా కుళ్ళిపోయిన ఈ పరిస్థితుల్లో ఆ కుళ్ళును కడగడం బాలకృష్ణకైనా, యంగ్‌ టైగర్‌కి అయినా చాలా కష్టమైన పనే. అసాధ్యమైతే కాదుగానీ, ఆ కుళ్ళుని కడిగే క్రమంలో బాలయ్య, ఎన్టీఆర్‌ ఎంతో కొంత దాన్ని అంటించుకోవాల్సి వస్తుంది. ఆల్రెడీ బాలయ్యకు అది అంటేసింది. జూనియర్‌ ఎన్టీఆర్‌ మాత్రం దూరంగా వున్నాడు. చంద్రబాబుని కాదని బాలయ్య బయటకు వస్తే, బాబాయ్‌ బాలయ్యకు అన్ని విధాలా అండగా వుండేందుకు యంగ్‌ టైగర్‌ సదా సిద్ధం.

తాజా ఎన్నికలకు ముందు యంగ్‌ టైగర్‌ ఎన్టీఆర్‌ మామగారు నార్నె శ్రీనివాసరావు అత్యంత వ్యూహాత్మకంగా వైఎస్సార్‌ కాంగ్రెస్‌ పార్టీలో చేరారు. అలా జూనియర్‌ ఎన్టీఆర్‌, వైసీపీ సానుభూతిపరుల నుంచీ సాఫ్ట్‌ కార్నర్‌ అందుకున్నాడు. దాన్ని ఇప్పటికిప్పుడు యంగ్‌ టైగర్‌ చెడగొట్టుకునే అవకాశమే లేదు. పవన్‌కళ్యాణ్‌, జనసేన పార్టీతో ఏమీ సాధించలేకపోయారు గనుక, యంగ్‌ టైగర్‌ ఇప్పుడు ఏమాత్రం రిస్క్‌ చేయాల్సిన పనిలేదు. అభిమానం వేరు, రాజకీయం వేరు. రాజకీయాల్లో ఈక్వేషన్స్‌ వేరేలా వుంటాయి. ఆ దెబ్బని ఆల్రెడీ చిరంజీవి, పవన్‌కళ్యాణ్‌ రుచిచూసేశారు.