టీ కప్పులో తుఫాను

ఎన్నికలకు ముందు నందమూరి బాలకృష్ణను చిరంజీవి పెద్ద తమ్ముడు నాగబాబు ఓ ఆట ఆడుకున్నాడు. ఓ సందర్భంలో బాలకృష్ణ తనకు పవన్ కళ్యాణ్ ఎవరో తెలియదు అన్నందుకు, తన తమ్ముడు అంతటి సూపర్ స్టార్ తెలియదా అంటూ నాగబాబు బాలయ్యపై కినుకపూనాడు. అంతే కాదు, దానిని రోజురోజుకూ పెంచుకుంటూ చివరకు ద్వేషంగా మార్చుకొని బాలయ్యపై రోజుకో కామెంట్ చేస్తూ సోషల్ మీడియాలో హల్ చల్ చేశాడు. పనిలో పనిగా తన యూ ట్యూబ్ ఛానెల్ మైలేజ్ పెంచుకున్నాడు.

బాలకృష్ణ ఫ్యాన్స్ కూడా తామేమీ తక్కువ కాదన్నట్టు నాగబాబును ఓ ఆట ఆడుకున్నారు. అయితే బాలయ్య ఎంతో ఇష్టపడి, కష్టపడి నటించిన ‘యన్టీఆర్ బయోపిక్’ లో మొదటి భాగం గుడ్ టాక్ సంపాదించినా, ఆట్టే కాసులు రాల్చలేకపోయింది. తరువాతి భాగం అంతే సంగతులు. ఇలాంటి ఫలితం చూడటానికి ఆ రోజుల్లో నాగబాబు చేసిన కామెంట్స్ సైతం పనిచేశాయని పరిశీలకుల భావన.

అదంతా అలా ఉంచితే, మొన్నటి ఎన్నికల్లో బాలకృష్ణ తన హిందూపురం స్థానం నుంచి మళ్ళీ పోటి చేసి గెలవగా, నరసాపురం ఎంపీగా పోటీ చేసి నాగబాబు, భీమవరం, గాజువాక నియోజకవర్గాల నుండి పోటీ చేసి పవన్ కళ్యాణ్ ఓటమి పాలయ్యారు. దీంతో బాలయ్య ఫ్యాన్స్ కు ఆనందంగానే ఉంది. కానీ, వారు అభిమానించే తెలుగుదేశం పార్టీ ఘోరపరాజయం పాలు కావడంతో శత్రువు శత్రువు మిత్రుడు అన్నట్టు బాలయ్య ఫ్యాన్స్ తో పవన్ బ్యాచ్ సైతం చేయి కలిపిందని వినికిడి.

సినిమారంగంలోనూ, రాజకీయరంగంలోనూ శాశ్వత శత్రుత్వం, శాశ్వత మిత్రుత్వం ఉండవని అంటారు. అదే తీరున ఇప్పుడు బాలయ్య, చిరంజీవి ఫ్యాన్స్ కలిశారని సమాచారం. ఈ నేపథ్యంలోనే బాలయ్య హీరోగా రూపొందబోయే ఓ చిత్రంలో నాగబాబు కీలక పాత్ర పోషించనున్నట్టు సమాచారం.