అభిమానులకు అరుదైన కానుక ఇవ్వనున్న మహేష్

సూపర్ స్టార్ మహేష్ బాబు అభిమానులకు అరుదైన కానుక ఇవ్వబోతున్నట్లు మీడియాలో వార్తలు చక్కర్లు కొడుతున్నాయి. సంక్రాంతికి విడుదల కానున్న సరిలేరు నీకెవ్వరు చిత్రంపై అటు అభిమానుల్లో ఇటు ప్రేక్షకుల్లో భారీ అంచనాలే ఉన్నాయి. ఇప్పటికే షూటింగ్ పూర్తి చేసుకున్న సరిలేరు నీకెవ్వరు ఇప్పుడు పోస్ట్ ప్రొడక్షన్ కార్యక్రమాలలో బిజీగా ఉంది. త్వరలోనే మహేష్ తో పాటు ఇతర నటుల డబ్బింగ్ పనులు కూడా పూర్తి కానున్నాయి.

మరోవైపు ఈ సినిమాకు సంబంధించిన ప్రమోషనల్ కార్యక్రమాలు జోరుగా సాగుతున్నాయి. ఇప్పటికే టీజర్ ను విడుదల చేశారు. నాలుగు పాటలను కూడా వదిలారు. వీటన్నిటికీ రెస్పాన్స్ అయితే బాగుంది. ముఖ్యంగా మూడో పాట యూ ఆర్ సో క్యూట్, టైటిల్ సాంగ్ విశేషంగా శ్రోతలను అలరిస్తున్నాయి.

ఇంకా ఒక పాట విడుదల చేయాల్సి ఉంది. వచ్చే సోమవారం ఈ పాట రిలీజ్ ఉండనుంది. ఇంకా థియేట్రికల్ ట్రైలర్ ను డిసెంబర్ 31న విడుదల చేయాలని భావిస్తున్నారు. ఇక జనవరి 5న ఈ చిత్ర ప్రీ రిలీజ్ ఈవెంట్ భారీ ఎత్తున జరగనున్న విషయం తెల్సిందే. ఈ ఫంక్షన్ కు మెగాస్టార్ చిరంజీవి గెస్ట్ గా రానుండడంతో మొత్తం ఫంక్షన్ కే కొత్త కళ వచ్చింది.

ఇక ఇవన్నీ కాకుండా మహేష్ ఈసారి తన అభిమానులకు సరికొత్త కానుక ఇవ్వాలని డిసైడ్ అయినట్లు తెలుస్తోంది. సినిమా రిలీజ్ కు ముందు మూడు రోజుల పాటు మహేష్ ఫ్యాన్స్ అండ్ గ్రీట్ లో పాలుపంచుకోనున్నాడట. అంటే మూడు రోజుల పాటు తన ఫ్యాన్స్ ను కలుసుకుని వాళ్లతో మాట్లాడి ఫోటోలు దిగడం వంటివన్నీ చేస్తాడన్నమాట.

ఫంక్షన్స్ లో అభిమానులకు కనిపించినా వాళ్ళను పర్సనల్ గా కలుసుకోవడం కుదరదు కాబట్టి ఈ విధంగా ప్లాన్ చేసినట్లు తెలుస్తోంది. ఈ మీట్ నిర్వహణ బాధ్యతలన్నీ ఫ్యాన్స్ అసోసియేషన్స్ కే అప్పగించాలని డిసైడ్ అయ్యారు.

ఈ మీట్ ఏ డేట్స్ లో ఉంటుందో త్వరలో తెలిసే అవకాశముంది. దీనికి సంబంధించిన మరిన్ని వివరాలు త్వరలో బయటకు రానున్నాయి.