విశాఖలో ‘వైసీపీ డీల్స్‌’.. నిజమేనని తేలిపోయిందిగా.!

ఎగ్జిక్యూటివ్‌ క్యాపిటల్‌గా విశాఖను ఎంపిక చేయడం వెనుక ‘దోపిడీ’ లక్ష్యం వుందంటూ విపక్షాలు విమర్శిస్తున్న వేళ, అధికార వైసీపీ ఎదురుదాడికి దిగుతుండడాన్ని చూస్తున్నాం. ప్రశాంతతకు మారు పేరైన విశాఖలో, కొన్ని ముఠాలు ప్రవేశించి.. అక్కడి ప్రశాంతతను దెబ్బకొగుతున్నాయనీ, ఈ ముఠాల వెనుక అధికార పార్టీ హస్తం వుందనీ ఆరోపణలు వెల్లువెత్తుతున్న విషయం విదితమే. ‘ఇది విశాఖ ఇమేజ్‌ని దెబ్బతీసే కుట్ర..’ అంటూ ఎదురుదాడికి దిగుతూ, తమ మీద విపక్షాలు బురదజల్లుతున్నాయని అధికార పార్టీ చెప్పుకుంటోంది. కానీ, గ్రౌండ్‌ లెవల్‌లో విపక్షాల ఆరోపణలే నిజమని తేలిపోతోంది.

తాజాగా వైసీపీ నుంచి ఆ పార్టీ నేత కొయ్య ప్రసాదరెడ్డి సస్పెన్షన్‌కి గురయ్యారు. కొయ్య ప్రసాదరెడ్డి, గతంలో వైసీపీ తరఫున చాలా యాక్టివ్‌గా పనిచేశారు. పార్టీ పెద్దలందరితోనూ ఆయనకు సన్నిహిత సంబంధాలున్నాయి. టీడీపీ హయాంలో భూ కుంభకోణాలపై కొయ్య ప్రసాదరెడ్డి చేసిన ఆరోపణలు అన్నీ ఇన్నీ కావు. చిత్రంగా ఆ కొయ్య ప్రసాదరెడ్డినే ఇప్పుడు వైసీపీ సస్పెండ్‌ చేసింది. అదీ, భూ కుంభకోణాలకు పాల్పడుతున్నాడని ఆరోపిస్తూ.

పార్టీ ముఖ్య నేత విజయసాయిరెడ్డి పేరు వాడుకుని దందాలు నిర్వహిస్తున్నారన్నది కొయ్య ప్రసాదరెడ్డిపై ఆరోపణ. నిజానికి, సస్పెండ్‌ చేయాల్సింది కొయ్య ప్రసాదరెడ్డిని కాదు.. విజయసాయిరెడ్డిని.. అంటూ విపక్షాలు మండిపడుతున్నాయి. ‘విశాఖలో అధికార పార్టీ ఆగడాలకు ఇదే నిదర్శనం. పెద్ద చేపని రక్షించేందుకు.. చిన్న చేపని ఇరికించేశారు..’ అంటూ విశాఖ జిల్లాలో జోరుగా సాగుతోంది.

2019 ఎన్నిలకంటే ముందరే విశాఖలో కొన్ని ముఠాలు మకాం పెట్టాయనీ, అక్కడ విలువైన భూముల్ని కొల్లగొట్టేశాయనీ, విశాఖ ఎగ్జిక్యూటివ్‌ క్యాపిటల్‌ వెనుక అధికార పార్టీ పెద్దల ఆలోచనలు వేరేలా వున్నాయని ప్రతిపక్షం తెలుగుదేశం పార్టీతోపాటు, ఇతర విపక్షాలూ ఆరోపిస్తున్న విషయం విదితమే.

ఏదిఏమైనా, తీవ్రమైన ఘటనలు జరిగినప్పుడు, హడావిడిగా చర్యలు తీసేసుకుంటున్నట్లు కన్పిస్తే సరిపోదు.. చర్యలు చిత్తశుద్ధితో కూడుకున్నవై వుండాలి. రెండేళ్ళుగా విశాఖలో జరిగిన భూముల కొనుగోళ్ళ లెక్కలు చిత్తశుద్ధితో వెలికి తీస్తే.. విశాఖలో దోపిడీ ఏ స్థాయిలో జరిగిందో తేలిపోతుందన్నది సగటు విశాఖ వాసుల మనోగతం.