కేసీఆర్‌ నేషనల్‌ పాలిటిక్స్‌.. ఇప్పుడు కాకపోతే ఇంకెప్పుడు.?

‘దేశంలో హెల్త్‌ ఎమర్జన్సీ పరిస్థితులు కనిపిస్తున్నాయి. ఆర్థిక ఎమర్జన్సీ కూడా ముందు ముందు రావొచ్చు. ఈ పరిస్థితుల్లో హెలికాప్టర్‌ మనీ అనేది దేశానికి ఎంతో ఉపయోగపడుతుంది.. కేంద్రమే, రాష్ట్రాల్ని ఆదుకోవాలి. నిధులు తెచ్చుకునేందుకు రాష్ట్రాలకు వెసులుబాటు కల్పించాలి..’ అంటూ కరోనా తొలి నాళ్ళలో తెలంగాణ ముఖ్యమంత్రి కేసీఆర్‌, కేంద్రాన్ని ఉద్దేశించి వ్యాఖ్యానించిన విషయం విదితమే. అయితే, కేసీఆర్‌ వ్యాఖ్యల్ని కేంద్ర ప్రభుత్వ పెద్దలు కొందరు వెటకారం చేశారు. కానీ, కేసీఆర్‌ చెప్పిందే జరిగి వుంటే.. దేశంలో పరిస్థితులు ఇప్పుడు ఇంకాస్త బెటర్‌గా వుండేవేమో.. అంటారు చాలామంది.

నిజానికి, కేసీఆర్‌.. కేంద్రాన్ని ప్రశ్నించడం ఇదే తొలిసారి కాదు. కేంద్రాన్ని ప్రశంసిస్తారు, కేంద్రాన్ని నిలదీస్తారు.. సందర్భాన్ని బట్టి కేసీఆర్‌ వ్యూహాలుంటాయి. తెలంగాణ ఉద్యమ నేపథ్యంలో ఆయన మాటలు ఆంధ్రోళ్ళకి కొంత బాధించి వుండొచ్చుగాక. కానీ, ఇప్పుడు కేసీఆర్‌ వ్యాఖ్యలు ఆంధ్రోళ్ళని కూడా ఆలోచింపజేస్తున్నాయి. ఆయన్ని ‘జాతీయ నాయకుడు’ అనే కోణంలో తెలుగునాట చాలామంది చూస్తున్నారు. సరే, కేసీఆర్‌.. ఏ పూట మాట ఎలా మార్చుతారో తెలియదు.. అన్న వాదననీ కొట్టి పారేయలేమనుకోండి.. అది వేరే సంగతి. మరోపక్క, కేసీఆర్‌.. జాతీయ రాజకీయాలపై ఫోకస్‌ పెట్టారంటూ ఎప్పటినుంచో ప్రచారం జరుగుతోంది.

‘దేశ ప్రధాని అయ్యే అర్హతలు కేసీఆర్‌కి వున్నాయి..’ అంటూ గులాబీ శ్రేణులు 2019 ఎన్నికలకు ముందు నానా హంగామా చేయడం చూశాం. ఆ లోక్‌సభ ఎన్నికల్లో టీఆర్‌ఎస్‌ ఆశించిన స్థాయిలో ఎంపీ సీట్లు రాలేదుగానీ, వచ్చి వుంటే.. పరిస్థితి ఇంకోలా వుండేది. ఇక, ఇప్పుడు కేసీఆర్‌.. జాతీయ రాజకీయాలపై సీరియస్‌గా దృష్టిపెట్టడమే కాదు, కొత్త రాజకీయ శక్తిగా అవతరించేందుకు రంగం సిద్ధం చేసుకుంటున్నారనే ప్రచారం జోరందుకుంది. త్వరలో కేసీఆర్‌, జాతీయ నాయకులతో సమావేశమవుతారట. దేశంలో కొత్త రాజకీయ ప్రత్యామ్నాయాన్ని ప్రకటించబోతున్నారట. అంతే కాదు, ‘నయా భారత్‌’ నినాదంతో ఓ కొత్త జాతీయ పార్టీని కూడా ప్రకటిస్తారన్న ప్రచారం జరుగుతోంది. కొత్త పార్టీ ప్రకటించడం జరగకపోవచ్చుగానీ.. కొత్త జాతీయ కూటమి అయితే ఆయన ఏర్పాటు చేసేందుకు అవకాశాలున్నాయి. అయితే, ఆయనతో ఎవరు కలిసొస్తారన్నదే మిలియన్‌ డాలర్ల ప్రశ్న.