జ్యుడీషియల్‌ రివ్యూ సరే.. అవినీతికి నిజంగానే చోటుండదా.?

ప్రాజెక్టులనగానే కాంట్రాక్టర్ల అవినీతి అనే అంశం తెరపైకొస్తుంటుంది. ‘అవినీతికి తావు లేని’ ప్రాజెక్టుని ప్రస్తుత రాజకీయాల్లో ఊహించగలమా.? కాంట్రాక్టర్లు ప్రభుత్వ పెద్దలకు తాయిలాలు ఇస్తుంటారు.. ప్రభుత్వ పెద్దలు ఆ కాంట్రాక్టర్లకు మేలు కలిగేలా ప్రాజెక్టుల్ని డిజైన్‌ చేస్తుంటాయి. ఇది ఎప్పటినుంచో నడుస్తున్న కథే. జ్యుడీషియల్‌ ప్రివ్యూ ద్వారా ప్రాజెక్టుల్లో అవినీతి లేకుండా చేస్తామని వైఎస్‌ జగన్‌ ప్రభుత్వం చెబుతుండడాన్ని తప్పు పట్టలేం.

అయితే, నిజంగానే అవినీతికి తావు లేకుండా ప్రాజెక్టుల నిర్మాణం పూర్తవుతుందా.? అన్నదే మిలియన్‌ డాలర్ల ప్రశ్న. ఇక, వైఎస్‌ జగన్‌ ప్రభుత్వం, 2646.84 కోట్ల రూపాయలతో రామాయణం పోర్టు నిర్మాణానికి ప్రణాళిక రచించింది. భావన పోర్టుకి సంబంధించి 2573.15 కోట్ల రూపాయల వ్యయాన్ని అంచనా వేసింది. నాలుగు ఫిషింగ్‌ హార్బర్ల నిర్మాణం కోసం 1205.77 కోట్ల రూపాయల మేర అంచనా వ్యయాన్ని నిర్ధారించారు.

అభ్యంతరాలు వుంటే 7 రోజుల్లో తెలియజేయాలన్నది మ్యారిటైమ్ బోర్డ్‌ పేర్కొన్న అంశం. జ్యుడీషియల్‌ ప్రివ్యూ మంచిదే. ఇందులో ఎవరూ తప్పుపట్టడానికి వీల్లేదు. కానీ, ‘కాస్ట్‌ ఎస్కలేషన్‌’ లేకుండా ఏ ప్రాజెక్టు కూడా పూర్తయ్యే పరిస్థితి వుండదు. మరోపక్క, తమకు అనుకూలంగా వున్న పార్టీలనే టెండర్లకు పిలుస్తున్నారనీ, రాజకీయ ప్రత్యర్థులకు చెందిన కంపెనీల్ని దూరం పెడుతున్నారన్న విమర్శలు ఈ మధ్య ఎక్కువగా వినిపిస్తున్నాయి.

జ్యుడీషియల్‌ ప్రివ్యూ, రివర్స్‌ టెండరింగ్‌.. వంటివి వినడానికి బాగానే వుంటాయి. కానీ, గ్రౌండ్‌ లెవల్‌లో పరిస్థితులు అందుకు భిన్నంగా వుంటాయని ఆయా రంగాలకు చెందిన నిపుణులు చెబుతున్నారు. ప్రత్యేకించి వైఎస్‌ జగన్‌ హయాంలో కీలక ప్రాజెక్టులు కొన్ని ఎంపిక చేసిన కంపెనీలకే దక్కుతుండడం కొత్త అనుమానాలకు తావిస్తోంది. అవినీతి రహిత పాలన.. అని చెప్పని ప్రభుత్వం అంటూ ఏదైనా వుంటుందా.? అవకాశమే లేదు.

వైఎస్‌ జగన్‌ ప్రభుత్వం కూడా అంతే. గతంలో చంద్రబాబు తాను ‘నిప్పు’ అని చెప్పుకున్నారు కాదు, చంద్రబాబు తప్పు.. అని వైసీపీ ఆరోపించింది. ఇప్పుడు వైసీపీ అధినేత తాను నిఖార్సయిన పాలన చేస్తున్నానంటున్నారు.. టీడీపీ మాత్రం, చెప్పేవి నీతులు.. దూరేవి డాష్‌ డాష్‌.. అంటూ వైసీపీ మీద విరుచుకుపడుతోంది.