జేసీ అసహనం మరింత పెరిగిందిగా..!

వివాదాస్పద వ్యాఖ్యలు, చేతలతో వార్తల్లో ఉండే అనంతపురం మాజీ ఎంపీ జేసీ దివాకర్రెడ్డి మరోసారి ఫైర్ అయ్యారు. ఈసారి ఏపీలోని అధికార, ప్రతిపక్ష పార్టీలు రెండింటిపైనా విరుచుకుపడ్డారు. ప్రధాన టార్గెట్ వైఎస్సార్ సీపీయే అయినా.. పనిలో పనిగా తన సొంత పార్టీ తెలుగుదేశంపైనా విమర్శలు గుప్పించారు. రాష్ట్రంలో రాక్షస పాలన కొనసాగుతోందని, అరాచకం రాజ్యమేలుతోందని ఆరోపించారు.

వైఎస్సార్ సీపీ మినహా మిగిలిన అన్ని పార్టీలూ రాజధానిగా అమరావతి వైపు మొగ్గు చూపుతున్నాయని పేర్కొన్నారు. రాజధానిగా అమరావతి మాత్రమే ఉండాలని స్పష్టంచేశారు. తెలుగుదేశం పార్టీ హయాంలో రాజధాని ప్రాంతంలో ఆ పార్టీ నేతలు ముందుగానే భూములు కొనుగులు చేశారని.. ఇప్పుడు వైఎస్సార్ సీపీ నేతలు విశాఖలో అదే పని చేస్తున్నారని దుయ్యబట్టారు. ఇలా అటు సొంత పార్టీని కూడా ఇరకాటంలో పడేశారు.

వాస్తవానికి రాష్టరంలో జగన్ అధికారంలోకి వచ్చిన తర్వాత జేసీ లక్ష్యంగా పలు పరిణామాలు చోటు చేసుకున్నాయి. ఆయన ట్రావెల్స్ బస్సులను అధికారులు భారీసంఖ్యలో సీజ్ చేశారు. దీంతో జేసీ కోర్టుకు వెళ్లి మరీ వాటిని విడిపించుకున్నారు. అయితే, ఆ మరుసటి రోజే మరో కేసు పెట్టి మళ్లీ బస్సులు సీజ్ చేశారు. దీంతో జేసీలో అసహనం మరింత తారాస్థాయికి చేరింది. ఈ నేపథ్యంలో జగన్ లక్ష్యంగా విరుచుకుపడుతున్నారు. ఓ దశలో ఆయన బీజేపీ వైపు చూస్తున్నారంటూ ప్రచారం జరిగింది. కేంద్ర మంత్రి కిషన్ రెడ్డితో భేటీ కావడంతో ఈ మేరకు ఊహాగానాలు వచ్చాయి.

అయితే, తాను బీజేపీలో చేరడంలేదని.. ప్రాంతీయ పార్టీలు ఉన్నంత వరకు టీడీపీలోనే ఉంటానని అప్పుడు స్పష్టంచేశారు. తాజాగా జేసీ ఈ విషయంలో ఆసక్తికర వ్యాఖ్యలు చేశారు. దేశంలో ప్రాంతీయ పార్టీలు ఉండకూడదని, జాతీయ పార్టీలు మాత్రమే ఉండాలని పేర్కొన్నారు. మొత్తానికి జగన్ పై జేసీకి ఉన్న అసహనం ఈ రూపంలో బయటపడుతోంది.