బీజేపీతో జగన్‌కి ముప్పు ముంచుకొస్తోంది!

తమిళనాడులో రాజకీయాల్ని అత్యంత ఛండాలంగా మార్చేసిన కమల దళం, కర్నాటక రాజకీయాల్లో అలజడి సృష్టిస్తోంది. ఆంధ్రప్రదేశ్‌ రాజకీయాల్లోనూ వేలు పెట్టేసి, తెలంగాణ రాజకీయాల్లో హల్‌చల్‌ చేద్దామనుకుంటోంది. కేంద్రంలో అధికారం తమది గనుక, ఎక్కడ ఏం చేసినా చెల్లిపోతుందనే ధోరణిలో వున్న బీజేపీ నేతలు, నైతిక విలువల్ని పూర్తిగా తుంగలో తొక్కేసి, అత్యంత భయంకరమైన రాజకీయాలు నడుపుతున్నారు.

చంద్రబాబు విదేశాలకు వెళ్ళగానే, టీడీపీ నుంచి నలుగురు రాజ్యసభ సభ్యుల్ని లాగేసి, రాత్రికి రాత్రి ఆ నలుగురు సభ్యుల గ్రూపుని బీజేపీలో అడ్డగోలుగా కలిపేసుకునే ప్రక్రియను పూర్తి చేసేసింది. ఇప్పుడు అదే స్కెచ్‌ని కర్నాటకలో చూచాయిగా అమలు చేస్తోంది బీజేపీ. కాంగ్రెస్‌ పార్టీకి చెందిన ఇద్దరు ఎమ్మెల్యేలు రాజీనామా చేసేయడంతో కర్నాటకలో కుమారస్వామి ప్రభుత్వం సంకటంలో పడింది.

బొటాబొటి మెజార్టీతో కుమారస్వామి మెజార్టీ ఇప్పటికే దినదిన గండం.. అన్నట్టు బతుకుతోన్న విషయం విదితమే. జేడీఎస్‌ – కాంగ్రెస్‌ సంకీర్ణ సర్కార్‌ని కాంగ్రెస్‌ ఎమ్మెల్యేలతోనే దెబ్బ కొట్టించాలన్నది బీజేపీ వ్యూహం. గతంలోనే ఒక్కో ఎమ్మెల్యేలకి పది కోట్ల చొప్పున బేరం పెట్టిన బీజేపీ, అప్పట్లో చావు దెబ్బ తినేసింది. లేకపోతే, కర్నాటకలో బీజేపీ ప్రభుత్వమే వుండేదిప్పుడు. కర్నాటక సంగతి సరే, ఆంధ్రప్రదేశ్‌ మాటేమిటి.? 151 మంది ఎమ్మెల్యేలున్న వైఎస్‌ఆర్‌ కాంగ్రెస్‌ పార్టీ ప్రభుత్వానికి ఐదేళ్ళూ బీజేపీతో సమస్యలేమీ రావా.? అంటే, రావని మాత్రం చెప్పలేం.

ఇటీవలి ఎన్నికల్లో బీజేపీ – వైసీపీ తెరవెనుకాల కలిసి పనిచేసినా, ఆ బంధం తెగిపోయే రోజు దగ్గర్లోనే వున్నట్లు కనిపిస్తోంది. అత్యంత విశ్వసనీయ వర్గాల సమాచారం ప్రకారం, ఇద్దరు ఎంపీలు, అరడజను మంది ఎమ్మెల్యేలకు బీజేపీ ఇప్పటికే గాలం వేసిందనీ.. అయితే, రాష్ట్రంలో పొలిటికల్‌ ఈక్వేషన్స్‌ని దృష్టిలో పెట్టుకుని.. ఆ నేతలెవరూ బీజేపీ వైపు వెళ్ళేందుకు ప్రస్తుతానికి సానుకూలంగా లేరనీ తెలుస్తోంది.

టీడీపీ నుంచి గనుక ఎమ్మెల్యేలు బీజేపీలోకి వెళితే, ఆటోమేటిక్‌గా వైసీపీ నుంచి కూడా వలసలు వుంటాయని బీజేపీ నేతలు చాలా ధీమాగా చెబుతున్నారు. ‘మూడేళ్ళలో రాష్ట్రంలో అనూహ్య రాజకీయ పరిణామాలు చోటు చేసుకుంటాయ్‌..’ అని బీజేపీ నేతలు చెబుతుండడం వెనుక పెద్ద స్కెచ్చే వుందట. ప్రత్యేక హోదా విషయంలో ఆల్రెడీ జగన్‌ సర్కార్‌పై మండిపడ్తున్న బీజేపీ, ముందు ముందు బలమైన ప్రతిపక్షంగా మారి.. జగన్‌ ప్రభుత్వానికి ముప్పు తెచ్చే అవకాశాల్లేకపోలేదని రాజకీయ విశ్లేషకులూ అంచనా వేస్తున్నారు.