కోర్టులో జగన్… అమరావతిలో పవన్

ఎప్పుడు ఏం జరుగుతుందో ఎవరూ చెప్పలేరు. అక్రమ ఆస్తుల కేసుల్లో జగన్ పై సీబీఐ ఇప్పటి వరకు 11 ఛార్జ్ షీట్ లు దాఖలు చేయగా, ఈడీ 6 అభియోగ పత్రాలు దాఖలు చేసిన సంగతి తెలిసిందే. గత 8 సంవత్సరాలుగా అక్రమ ఆస్తుల కేసుల్లో జగన్ కోర్టు చుట్టూ తిరుగుతున్నారు. గతేడాది మార్చి 22 వ తేదీన జగన్ ఆఖరిసారి కోర్టుకు హాజరయ్యారు. ఆ తరువాత ఆయా తరపు లాయర్లే హాజరవుతూ వాయిదాలు వేస్తూ వస్తున్నారు. ఇప్పటికే పదిసార్లు వాయిదా వేయడంతో, ఇక కుదరదని, జగన్ ఈ కేసులో కోర్టుకు హాజరు కావాల్సిందే అని సిబిఐ కోర్టు ఆదేశించడంతో ఈరోజు అయన కోర్టుకు హాజరయ్యారు.

ముఖ్యమంత్రి హోదాలో తొలిసారి అయన కోర్టుకు హాజరు కావడంతో హైదరాబాద్ లో బందోబస్త్ ను ఏర్పాటు చేయాల్సి వచ్చింది. ముఖ్యమంత్రి హోదా కాబట్టి తప్పలేదు. అయితే, ఈ కేసులో ఈరోజు ఎలాంటి విచారణ జరుగుతుంది అనే దానిపై ఆసక్తి నెలకొన్నది. జగన్ వ్యతిరేక వర్గం వ్యక్తులు ఈ కేసులో ఆయనకు శిక్షపడాలని, అప్పుడే ఆంధ్రప్రదేశ్ రాష్ట్రం బాగుందని అంటున్నారు.

హైదరాబాద్ లో జగన్ కోర్టుకు హాజరు కాగా, మంగళగిరిలో జనసేన అధ్యక్షుడు పవన్ కళ్యాణ్ జనసేన నేతలతో సమావేశం అవుతున్నారు. ప్రస్తుతం జరుగుతున్న విషయాలపై నేతలతో చర్చించబోతున్నారు. రాజదాని రైతుల విషయంలో ఎలాంటి నిర్ణయాలు తీసుకోవాలి, రైతుల కోసం ఎలా పోరాటం చేయాలి, ఒకవేళ రాజధానిని మార్చేందుకు ప్రభుత్వం సిద్ధమైతే, దానిని అడ్డుకోవడానికి ఎలాంటి ప్లాన్ వేయాలి అనే విషయాలు చర్చించబోతున్నారు.

రాజధాని ప్రాంతం ఇప్పటికే రణరంగంగా మారింది. విజయవాడ బెంజ్ సర్కిల్ లో పోలీసులు భారీగా మోహరించి తెలుగుదేశం పార్టీ నేతలను అరెస్ట్ చేస్తున్నారు. టీడీపీ నేతలను గృహనిర్బంధం చేస్తున్నారు. అలానే రాజధాని ప్రాంతంలో రైతులపైన, మహిళపైన పోలీసులు లాఠీ ఛార్జ్ చేస్తున్నారు. గుడికి వెళ్లి అమ్మవారికి పొంగళ్ళు పెట్టుకోవడానికి వెళ్తున్నామని చెప్పినా వినడం లేదు. మహిళపై లాఠీ ఛార్జ్ చేయడంతో ఆ ప్రాంతంలో ఉద్రిక్తకరమైన పరిస్థితులు నెలకొన్నాయి. రైతు ప్రభుత్వంగా చెప్పుకున్న జగన్ ఇలా రైతులపై లాఠీ ఛార్జ్ చేయడం దారుణం అని అంటున్నారు తెలుగుదేశం పార్టీ నేతలు.