ఇన్‌సైడ్ స్టోరీ: రఘురామ లేఖలే వైసీపీని భయపెట్టాయా.?

‘రాజద్రోహం’ పేరుతో తనను అక్రమంగా నిర్భంధించి, తన మీద దాడి చేయడం దుర్మార్గమంటూ వైసీపీ రెబల్ ఎంపీ రఘురామకృష్ణరాజు జాతీయ స్థాయిలో పోరాటం చేస్తోన్న విషయం విదితమే. వివిధ రాష్ట్రాల ముఖ్యమంత్రులకు (ఆంధ్రపదేశ్ ముఖ్యమంత్రి వైఎస్ జగన్ మోహన్ రెడ్డికి తప్ప) ఈ మేరకు ఆయన లేఖలు రాశారు. ‘సెక్షన్ 124 ఎ’ రద్దు కోసం ఆయా అసెంబ్లీల్లో తీర్మానాలు చేయాలని రఘురామ కోరారు. మరోపక్క, గవర్నర్లకూ ఈ మేరకు ఆయన లేఖలు రాశారు. ఈ వ్యవహారంపై దేశవ్యాప్తంగా చర్చ జరుగుతోంది. మరోపక్క, పలు న్యాయస్థాలు ఇటీవల ఈ ‘రాజద్రోహం’ కేసులపై అసహనం వ్యక్తం చేస్తూ, సదరు సెక్షన్ విషయమై నిజాలు నిగ్గు తేల్చాలంటూ వ్యాఖ్యానిస్తున్న సంగతి తెలిసిందే.

ఈ మొత్తం వ్యవహారంలో ఆంధ్రపదేశ్ రాష్ట్ర ప్రభుత్వం టార్గెట్ అవుతోందని భావించిన అధికార వైసీపీ హుటాహుటిన ఢిల్లీ యాత్ర పెట్టుకుందన్న చర్చ రాజకీయ వర్గాల్లో జోరుగా సాగుతోంది. ముఖ్యమంత్రి వైఎస్ జగన్ నేతృత్వంలో పలువురు వైసీపీ ముఖ్య నేతలు ఢిల్లీకి వెళ్ళిన విషయం విదితమే. ముఖ్యమంత్రి అధికారిక పర్యటనతోపాటుగా, తెరవెనుక రాజకీయ వ్యవహారాలు గట్టిగా నడిచాయన్న చర్చ జరుగుతోంది. ప్రధానంగా రఘురామ వ్యవహారంపైనే పలువురు కేంద్ర మంత్రుల దగ్గర చర్చ జరిగిందట. కేంద్ర జల శక్తి మంత్రి దగ్గర, రఘురామ పోలవరం నిర్వాసితుల నష్టపరిహారం పక్కదారి పడుతున్న వైనం గురించిన చర్చ వచ్చిందనీ, కేంద్ర హోం శాఖ మంత్రి అమిత్ షా దగ్గర రఘురామపై రాజద్రోహం కేసు వ్యవహారాలు చర్చకు వచ్చాయనీ ఢిల్లీ నుంచి లీకులు అందుతున్నాయి తెలుగు మీడియాకి.

రఘురామ విషయమై వైసీపీ ముఖ్య నేతలు చేసిన ఫిర్యాదుల పట్ల కేంద్ర మంత్రులు సరిగ్గా స్పందించలేదనీ, స్పీకర్ ఓం బిర్లాకు మరోసారి ఫిర్యాదు చేసి ఉస్సూరుమంటూ వెనక్కి వచ్చారనే చర్చ తెలుగు మీడియాలో జరుగుతోంది. కేవలం రాష్ట్ర ప్రయోజనాల కోసమే ముఖ్యమంత్రి సహా, వైసీపీ ముఖ్య నేతలు ఢిల్లీకి వెళ్ళి వుంటే, వారితోపాటు ఓ కేంద్ర మంత్రి అయినా మీడియా సమావేశాన్ని ఏర్పాటు చేసేవారు కదా.? అన్న ప్రశ్న తెరపైకొస్తోంది.