టీం ఇండియా స్పిన్ బౌలర్ హర్భజన్ సింగ్ క్రికెట్కు గుడ్ బై చెప్పిన విషయం తెల్సిందే. ప్రస్తుతం ఈయన సినీ రంగంలో అడుగు పెట్టేందుకు సిద్దం అవుతున్నాడు. ఈయన కెరీర్లో టీం ఇండియాకు ఎన్నో విజయాలను అందించాడు. ఇప్పుడు సినిమా పరిశ్రమలో అడుగు పెట్టి విజయాలను దక్కించుకునేందుకు రెడీ అయ్యాడు. ఈయన మొదటి సినిమా తమిళంలో రూపొందబోతుంది. అందుకు సంబంధించిన టైటిల్ను కూడా అనౌన్స్ చేసి ఫస్ట్లుక్ను విడుదల చేశారు.
ఈ చిత్రానికి ‘ఫ్రెండ్షిప్’ అనే టైటిల్ను పెట్టారు. ఇద్దరి చేతులకు బేడీలు వేసి ఉండటంతో వారిద్దరు స్నేహితులు అయ్యి ఉంటారని ఫస్ట్ లుక్ చూస్తుంటేనే అర్థం అయ్యింది. ఇక అందులో ఒక చేయి హర్భజన్ సింగ్ది కాగా మరో చేయి ఎవరిది అనే విషయాన్ని చిత్ర యూనిట్ సభ్యులు క్లారిటీ ఇవ్వాల్సి ఉంది. హర్భజన్తో పాటు ఈ చిత్రంలో మరో హీరో కూడా ఉంటాడా అనే చర్చ కూడా జరుగుతుంది.
శ్యామ్, జేపీఆర్లు కలిసి ఈ చిత్రాన్ని తెరకెక్కించబోతున్నారు. ఒక విభిన్నమైన కాన్సెప్ట్తో వీరు హర్భజన్ సింగ్ను హీరోగా పరిచయం చేయబోతున్నారు. గతంలో పలు చిత్రాల్లో గెస్ట్ రోల్స్లో కనిపించిన హర్భజన్ సింగ్ ఇప్పుడు పూర్తి స్థాయి హీరోగా మారబోతున్న నేపథ్యంలో ఆయన అభిమానులు ఫుల్ ఖుషీ అవుతున్నారు.
ఈ చిత్రానికి సంబంధించిన ప్రీ ప్రొడక్షన్ వర్క్ జరుగుతుంది. అతి త్వరలోనే సినిమా షూటింగ్ను ప్రారంభించబోతున్నట్లుగా తెలుస్తోంది. హర్భజన్ సింగ్కు దేశ వ్యాప్తంగా స్టార్ క్రేజ్ ఉంది. అందుకే ఈ చిత్రాన్ని ఇండియాలోని పలు భాషల్లో డబ్ చేసి విడుదల చేయబోతున్నారట. సినిమా హీరోయిన్స్ మరియు ఇతర వివరాలు అతి త్వరలోనే వెళ్లడిస్తామంటూ యూనిట్ సభ్యులు ప్రకటించారు.