ఎట్టకేలకు ఆర్మీ ఆసుపత్రికి పయనమైన రఘురామ.. తర్వాత ఏంటి.?

ప్రభుత్వాసుపత్రిలో వైద్య పరీక్షలు నిర్వహించి, ఆ తర్వాత ప్రైవేటు ఆసుపత్రిలోనూ వైద్య పరీక్షలు నిర్వహించాలని న్యాయస్థానం ఆదేశించినా, ఏపీ సీఐడీ.. ఎంపీ రఘురామకృష్ణరాజుని అనూహ్యంగా జైలుకి తరలించిన విషయం విదితమే. జైలులో ఆయనకు రిమాండ్ ఖైదీగా నెంబర్ కూడా కేటాయించారు. మరోపక్క, తనకు జరుగుతున్న అన్యాయంపై రఘురామ, సుప్రీంకోర్టును ఆశ్రయించి ఊరట పొందారు. అయితే, ప్రైవేటు ఆసుపత్రిలో కాకుండా, ఆర్మీ ఆసుపత్రిలో రఘురామకు వైద్య పరీక్షలు నిర్వహించాలని సుప్రీంకోర్టు ఆదేశించింది. అయినాగానీ, ఆ ఆదేశాలు అమలవుతాయా.? లేదా.? అన్న అనుమానాలైతే అందరిలోనూ వున్నాయి.

అయితే, ఈసారి మాత్రం ఎలాంటి తప్పటడుగులూ వేయడానికి ఏపీ సీఐడీ, రాష్ట్ర ప్రభుత్వం ప్రయత్నించినట్టు లేదు. సుప్రీం ఆదేశాల మేరకు, రఘురామకృష్ణరాజుని సికింద్రాబాద్ తరలించింది. కాస్సేపటి క్రితం గుంటూరు నుంచి సికింద్రాబాద్ పయనమయ్యారు రఘురామకృష్ణరాజు. దాంతో, రఘురామ అరెస్టు వ్యవహారంలో ఇదొక కీలక పరిణామంగా చెప్పుకోవచ్చు.

సికింద్రాబాద్ ఆర్మీ ఆసుపత్రిలో తెలంగాణ హైకోర్టు నియమించే జ్యుడీషియల్ అధికారి సమక్షంలో రఘురామకు వైద్య పరీక్షలు జరుగుతాయి. అక్కడే ఆయనకు వైద్య చికిత్స కూడా అందనుంది. తనను హైద్రాబాదులో అరెస్ట్ చేసిన అనంతరం, తనను గుంటూరుకి తరలించారనీ.. గుర్తు తెలియని వ్యక్తులు తనపై దాడి చేసి, తనను తీవ్రంగా కొట్టారనీ రఘురామ ఆరోపించిన విషయం విదితమే. ఇదంతా ఏపీ సీఐడీ అదుపులో రఘురామ వున్నప్పుడే జరిగిందని రఘురామ తరఫు న్యాయవాదులు, కోర్టుకు విన్నవించారు. ఈ నేపథ్యంలో ఈ దాడి అంశం దేశవ్యాప్తంగా చర్చనీయాంశమయ్యింది.

దేశ చరిత్రలో ఏ ఎంపీపైనా ఇంతవరకూ ఇలాంటి దాడి జరగలేదన్నది రాజకీయ విశ్లేషకుల అభిప్రాయం. అయితే, అవి అసలు దెబ్బల వల్ల తగిలిన గాయాలు కాదనీ, రఘురామకి వున్న అనారోగ్య సమస్యలే ఆ ఎర్రటి మచ్చలకు, కాళ్ళ వాపులకు కారణమని వైఎస్ జగన్ పభుత్వం చెబుతోన్న విషయం విదితమే. ఏమో, ఆర్మీ ఆసుపత్రి ఏం చెబుతుందోగానీ, ప్రస్తుతానికైతే రఘురామకి కొంత ఊరట లభించింది.. ఎట్టకేలకు ఆయన సికింద్రాబాద్ పయనమయ్యారు.. అదీ జ్యుడీషియల్ కస్టడీలో భాగంగానే కావడం గమనార్హం.