Trivikram: పవన్ కళ్యాణ్ – త్రివిక్రమ్ శ్రీనివాస్ కాంబినేషన్ అంటే.. ఆ కిక్కే వేరప్పా.! ‘అత్తారింటికి దారేది’ లాంటి సూపర్ హిట్ సినిమానే కాదు, ‘అజ్ఞాతవాసి’ లాంటి డిజాస్టర్ కూడా ఈ కాంబినేషన్ నుంచి వచ్చింది. సరే, సినిమా రంగంలో హిట్టూ.. ఫ్లాపూ.. ఇవన్నీ మామూలే.! కావాలని ఎవరూ ఫ్లాప్ సినిమా చేయరు కదా.?
‘అజ్ఞాతవాసి’ సినిమాలో ఫస్టాఫ్ విషయమై చాలా విమర్శలొచ్చాయి. ‘ఇలా చేశావేంటి త్రివిక్రమ్.?’ అంటూ అభిమానులు గుస్సా అయ్యారు అప్పట్లో. ప్రస్తుతం పవన్ కళ్యాణ్ ఏ సినిమా ఒప్పుకున్నా, ఆ సినిమా వెనుక ఏదో ఒక రూపంలో త్రివిక్రమ్ శ్రీనివాస్ పాత్ర ఖచ్చితంగా వుంటోంది.
‘వకీల్ సాబ్’, ‘భీమ్లానాయక్’ సినిమాలపై త్రివిక్రమ్ ముద్ర గురించి కొత్తగా చెప్పేదేముంది.? ‘బ్రో’ కూడా అంతే. జస్ట్ పది నిమిషాల్లో సినిమాకి సంబంధించి మార్పుల్ని దర్శకుడు సముద్రఖనికి సూచించాడనే వార్తలు బయటికి వచ్చాయి. త్రివిక్రమ్. తమిళ సినిమా ‘వినోదయ సితం’కి ‘బ్రో’ తెలుగు రీమేక్.
పది నిమిషాల్లోనే మార్పులు చేసి, ప్రాజెక్ట్ ఓకే చేసెయ్యడమేంటి.? అదీ, పవన్ కళ్యాణ్ చేసే సినిమా కోసం ఇంత నిర్లక్ష్యమా.? అన్న ఆవేదన, సినిమా రిలీజయ్యాక మరింత గట్టిగా వినిపిస్తోంది అభిమానుల నుంచి. సినిమాలో త్రివిక్రమ్ మార్కు డైలాగులు కనిపించలేదు. చిన్నా చితకా మార్పులు ఒరిజినల్తో పోల్చితే, తెలుగు ఆడియన్స్ మరింతగా కనెక్ట్ అయ్యేలా ఆశ్చర్యకరమైన మార్పులేమీ త్రివిక్రమ్ చేయలేకపోయాడనే టాక్ అంతటా నడుస్తోందిప్పుడు.
అయితే.. బ్రో మూవీ టాక్ పై మిశ్రమ స్పందన వచ్చింది. కొంతమంది ప్రేక్షకులకు, ముఖ్యంగా ఫ్యామిలీ ఆడియన్స్ కు.. ఈ సినిమా నచ్చింది అనే టాక్ ఉన్నా.. కొంతమంది అభిమానులు ఎక్కడో అసంతృప్తి కి గురయ్యారు. దాంతో నిర్మాణంలో కీలక పాత్ర పోషించిన త్రివిక్రమ్ పై ట్రోలింగ్ షురూ అయింది.
పవన్ కళ్యాణ్ ఎనర్జీ సూపర్ హిట్ అయితే, త్రివిక్రమ్ మార్కు లేకపోవడం గురించే చర్చ నడుస్తోంది సోషల్ మీడియాలో.. ఏ ప్రాజెక్ట్ అయినా పవన్ కళ్యాణ్ దగ్గరకు వెళ్ళాలంటే త్రివిక్రమ్ని దాటి వెళ్ళాలనే భావన నెలకొన్న దరిమిలా.. త్రివిక్రమ్ ఇంకా శ్రద్ధ పెట్టి ఉంటే బాగుండేదనే అభిప్రాయం వ్యక్తం అవుతోంది..