Chiranjeevi Helping Hand: యథా చిరంజీవి.. తథా ఫ్యాన్స్..! రాజమండ్రిలో మదర్ థెరెస్సా విగ్రహం ఏర్పాటు..

హీరో ఫ్యాన్స్ కేవలం సినిమాలకు కటౌట్లు ఏర్పాటు చేసి, బ్యానర్లు కట్టి హంగామా చేస్తారనే సమాజం అభిప్రాయాన్ని మార్చి.. వారిని సమాజానికి ఉపయోగపడే సేవకులగా నిలిపిన వ్యక్తిత్వం చిరంజీవి సొంతం. తనపై మెగా ఫ్యాన్స్ చూపే అభిమానాన్ని ఆయన అనేక రూపాల్లో ప్రజలకు సేవ చేసేలా మళ్లించారు. వారిలోనూ స్ఫూర్తి రగిలించారు. ఇది చిరంజీవి-అభిమానుల మధ్య బంధం మరింత బలపడేలా చేసింది. ఫ్యాన్స్ కు ఆయనపై ఉన్న అభిమానం ఏకంగా చిరంజీవికి గుడి కట్టించేంత. కానీ.. చిరంజీవి ఆ దిశగా వారిని వెళ్లనీయలేదు. కారణం.. వారిలో చిరంజీవి రగిలించిన సేవా స్ఫూర్తి కారణం. ఇందుకు నిదర్శనం రాజమండ్రిలో చిరంజీవి పేరుతో పార్క్ అభివృద్ధి చేసి ఆ స్థలంలో సేవకు నిర్వచనమైన మదర్ థెరెస్సా విగ్రహం ఏర్పాటయ్యేలా చేశారు.

ఇందుకు మెగా ఫ్యాన్స్ పెద్ద కసరత్తే చేశారు. అప్పటి రాజమండ్రి ఎంపీ సత్యనారాయణ రావు గారు, మంత్రి జక్కంపూడి రామ్ మోహన్ రావు గారి ద్వారా రాజమండ్రిలోని కంబాల చెరువు ప్రాంతంలో ఓ స్థలం ప్రభుత్వం నుంచి తీసుకుని పార్కుగా ఏర్పాటు చేసేందుకు కృషి చేశారు. ప్రభుత్వం, రాజమండ్రి మున్సిపాలిటీ నుంచి స్థలాన్ని అభివృద్ధి చేయడానికి తీసుకోవడానికి ఎంపీ, మంత్రి ద్వారా సంప్రదించి చిరంజీవి అభిమానులు తమ అభిమాన హీరో చిరంజీవి చేపట్టే సేవా కార్యక్రమాలకు స్ఫూర్తి ప్రదాత అయిన మదర్ థెరెస్సా విగ్రహం ఏర్పాటు చేశారు. ఈ కార్యక్రమానికి చిరంజీవి స్వయంగా రాజమండ్రి వచ్చారు. ఎయిర్ పోర్ట్ నుంచి చిరంజీవి అభిమానుల శ్రేణి భారీగా తరలివచ్చిన విషయం ఇప్పటికీ ఓ రికార్డు.

చిరంజీవి కంబాల చెరువు ప్రాంతం చేరుకునే సరికే అక్కడ ఇసుకేస్తే రాలనంత జనం వచ్చేశారు. మదర్ థెరెస్సా విగ్రహం ప్రారంభానికి వచ్చిన చిరంజీవినే జీపు దిగి విగ్రహం వద్దకు వెళ్లలేని పరిస్థితి నెలకొంది. దీంతో దూరం నుంచే చిరంజీవి సంజ్ఞ ద్వారా నగర మేయర్ ఆ సేవామూర్తి విగ్రహాన్ని ఆవిష్కరించారు. కర్నూలు పట్టణంలో జరిగిన పవన్ కల్యాణ్ తమ్ముడు శతదినోత్సవ వేడుకల సందర్భంగా అభిమానులు ఏర్పాటు చేసిన మదర్ థెరెస్సా విగ్రహాన్ని చిరంజీవి, నాగబాబు, పవన్ కల్యాణ్ కలిసి ఆవిష్కరించారు. చిరంజీవి అభిమానులు అనేక పట్టణాల్లో ఏర్పాటు చేసిన బస్ షెల్టర్లు అనేకం. ఇటువంటి కార్యక్రమాలన్నీ చిరంజీవి ఫ్యాన్స్ ను సమాజ సేవకులుగా అదే సమాజంలో పేరు తెచ్చుకున్నారు. ఇదంతా చిరంజీవిలోని ఉన్నతమైన మనసుకు నిదర్శనం.