ఎక్స్ క్లూజివ్ ఇంటర్వ్యూ: సాయిమాధవ్ బుర్రా – ఒక్కసారి పవన్ కళ్యాణ్ మూవీకి పనిచేస్తే, ప్రతి సినిమాకి చేయాలనిపిస్తుంది.

‘మళ్లీమళ్లీ ఇదిరాని రోజు’, ‘కంచె’, ‘ఖైదీ నెం 150’, ‘గౌతమీపుత్ర శాతకర్ణి’, ‘మహానటి’ లాంటి ఎన్నో బ్లాక్ బస్టర్ చిత్రాలకు అద్భుతమైన డైలాగ్స్ అందించిన స్టార్ రైటర్ సాయిమాధవ్ బుర్రా. లాక్ డౌన్ కి ముందు ఆయన తెలుగు చిత్ర సీమలో రూపొందుతున్న ప్రతిష్టాత్మక చిత్రాలైన ఆర్ఆర్ఆర్ మరియు పవన్ కళ్యాణ్ – క్రిష్ సినిమాలకు మాటలు రాస్తున్నారు. ఈ సందర్భంగా ఆయనతో కాసేపు చిట్ చాట్ చేసి తెలుసుకున్న పలు విశేషాలు మీకోసం..

ప్రశ్న) ప్రతి రచయిత, డైరెక్టర్ ఈ లాక్ డౌన్ టైంలో హీరోల కోసం కథలు రాస్తున్నారు. మీరు ఏ హీరో కోసమైనా కథ రాశారా?
స) నాకు ఈ హీరో కోసం, ఆ హీరో కోసం అని కథలు రాసే అలవాటు లేదు. నాకు నచ్చిన పాయింట్ తో ఓ కథ రాస్తాను. అలా ఈ లాక్ డౌన్ లో కూడా కొన్ని కథలు రాసాను. హీరోలు ఎవరనేది అనుకోలేదు.

ప్రశ్న) ఆర్ఆర్ఆర్ ఓ పాన్ ఇండియా సినిమా. అందులోనూ ఎన్.టి.ఆర్ – రామ్ చరణ్ లాంటి ఇద్దరి స్టార్ హీరోలని ఒకేసారి తెరపై చూపించడం డైరెక్టర్ కి కత్తిమీద సాము లాంటిది. అలాంటి సినిమాకి ఒక రైటర్ గా డైలాగ్స్ రాయడంలో ఎలాంటి సవాళ్లు ఎదుర్కొన్నారు?
స) ఇద్దరి పాత్రలని దర్శకుడు ఎలా అయితే బాలన్స్ చేశారో అదే విధంగా బాలన్స్ చేస్తూ రాసుకుంటూ వచ్చాను. ఇద్దరు హీరోలు ఎవరి పాత్ర ఎక్కువ ఎవరి పాత్ర తక్కువ అని కాకుండా ఇద్దరి పాత్రల నిడివి సరిసమానంగా ఉంటుంది. అలాగే ఆర్ఆర్ఆర్ అనేది నెక్స్ట్ లెవల్ సినిమా. ప్రేక్షకులు ఏ రేంజ్ అంచనాలతో వచ్చినా ఆ అంచనాలకు మించి ఉండే సినిమా ‘ఆర్ఆర్ఆర్’.

ప్రశ్న) క్రిష్ సినిమాలో పవన్ కళ్యాణ్ చేస్తున్న పాత్ర మహబూబ్ నగర్ కి చెందిన పండగల సాయన్న అని, సినిమా రాబిన్ హుడ్ తరహాలో ఉంటుందని వార్తలు వస్తున్నాయి. అందులో నిజానిజాలెన్ని?
స) ఆ వార్తల్లో అసలు నిజం లేదు.. ఎవరి ఊహకి తగ్గట్టు వాళ్ళు రాసుకుంటున్నారు. నాకు తెలిసి ఎవరూ ఓరిజినల్ డీటైల్స్ చెప్పరు. అది ప్రొఫెషనలిజం కాదు కదా..

ప్రశ్న) పవన్ కళ్యాణ్ తో ఇప్పుడు మూడవ సినిమా చేస్తున్నారు. ఆయనతో మీ అనుభవం గురించి చెప్పండి?
స) పవన్ కళ్యాణ్ ఒక ఎన్సైక్లోపీడియా.. ఆయనకీ తెలియంది విషయం లేదు. సినిమా పరంగా ఆయన 24 క్రాఫ్ట్ లపైన 100% నాలెడ్జ్, కమాండ్ ఉన్న వ్యక్తి. ఆయన స్టార్ గా ఎంత పెద్ద స్టారో, అంతే గొప్ప వ్యక్తి కూడా. ఆయనతో పరిచయం అనేదే ఓ అదృష్టం. అలాంటి ఆయనతో కలిసి మూడో సినిమా చేయడం అనే అనుభూతిని మాటల్లో వర్ణించలేం. ఒకసారి ఆయనతో ప్రయాణం మొదలైతే ఆయనతో ప్రతి సినిమాకి పనిచేయాలనిపిస్తుంది.

ప్రశ్న) సింగీతం శ్రీనివాసరావు – బాలకృష్ణ కలిసి చేయనున్న ‘ఆదిత్య 999’ సినిమాకి మీరే డైలాగ్ రైటర్ గా పని చేస్తున్నారా?
స) బాలయ్య బాబు – సింగీతం గారి సినిమా ఆఫర్ అయితే నా వరకూ ఇంకా రాలేదు. అది కాకుండా సింగీతం గారితో కలిసి ఓ బయోపిక్ కథని సిద్ధం చేసాము. అది లేడీ ఓరియెంటెడ్ స్క్రిప్ట్. అందులో అయితే బాలయ్య బాబు నటించడం లేదు. ప్రస్తుతం ఆ సినిమా ప్రీ ప్రొడక్షన్ పనులు జరుగుతున్నాయి.

ప్రశ్న) శర్వానంద్ శ్రీకారం సినిమా ఎలా ఉండబోతుంది?
స) నూతన దర్శకుడు కిషోర్ చాలా బాగా రాసుకొని, అంతే బాగా తీసిన సినిమా శ్రీకారం. ఎంటర్టైన్మెంట్, ఎమోషన్స్, మెసేజ్ ఇలా అన్నీ కలగలిపిన సినిమా. ముఖ్యంగా ఇప్పుడు ఈ టైంలో ప్రజలకి పక్కాగా చెప్పాల్సిన పాయింట్ ని చూపించే సినిమా శ్రీకారం.

ప్రశ్న) మీరు డైరెక్టర్ గా సినిమా చేయబోతున్నారు అనే వార్తలు వచ్చాయి. దానిపై మీ కామెంట్?
స) అవన్నీ ఒట్టి గాలి వార్తలు. ప్రస్తుతం రచయితగా బిజీగా ఉన్నాను. ప్రస్తుతానికైతే డైరెక్టర్ అవ్వాలనే ఆలోచన నా మదిలోకి రాలేదు. భవిష్యత్తులో ఆ ఆలోచన రాదు అని కూడా కచ్చితంగా చెప్పలేను.

ప్రశ్న) సాంఘికం, చారిత్రికం, ప్రేమ కథలు ఇలా అన్ని తరహా సినిమాలకు డైలాగ్స్ రాస్తున్నారు. మీకు ఏ తరహా సినిమాలకి రాయడం ఎక్కువ సంతృప్తినిచ్చింది?
స) నేను రచయితగా జానర్ తో సంబంధం లేకుండా అన్నిరకాల సినిమాలు రాయడానికి ఇష్టపడతాను. సాయి మాధవ్ బుర్రా అంటే అన్ని జానర్స్ టచ్ చేసాడు, అన్నింటిలో ది బెస్ట్ ఇచ్చాడు అనే సంతృప్తి నాకు కావాలి. ఆ దిశగా నా ప్రయాణం కూడా సాగుతోంది.

ప్రశ్న) మీ తదుపరి సినిమాల గురించి చెప్పండి?
స) రవితేజ క్రాక్, శర్వానంద్ శ్రీకారం సినిమాలు దాదాపు షూట్ ఫినిష్ చేసుకొని రిలీజ్ కి రెడీ ఉన్నాయి. అలాగే రాజమౌళి ‘ఆర్ఆర్ఆర్’, పవన్ కళ్యాణ్ – క్రిష్ గారి సినిమాలు సెట్స్ పై ఉన్నాయి. సింగీతం శ్రీనివాసరావు చేసే బయోపిక్ కథ ఫినిష్ చేసాం. ప్రభాస్ – నాగ్ అశ్విన్ సినిమాకి కూడా పని చేస్తున్నాను. స్క్రిప్ట్ వర్క్ చేస్తున్నాం. ప్రభాస్ సినిమా గురించి ఏం చెప్పలేను, కానీ అది పాన్ ఇండియా కి మించి పాన్ వరల్డ్ సినిమా అనే రేంజ్ లో ఉంటుందని మాత్రం చెప్పగలను. వి కాకుండా మరో రెండు సినిమాలకి డైలాగ్స్ రాస్తున్నాను.