హీరోల అభిమానులు మంచోళ్ళా.? చెడ్డోళ్ళా.?

సోషల్‌ మీడియాలో ఏం చేసినా చెల్లిపోతుందనే భావనే.. సోషల్‌ మీడియా వేదికల్ని ‘పెంట కుప్పల్లా’ మార్చేశాయి. సభ్య సమాజం సిగ్గుతో తలదించుకునేలా కొందరు సోషల్‌ మీడియాలో ‘భాషా ప్రయోగాలు’ చేస్తున్నారు. ఈ బూతుల ప్రవాహం రోజురోజుకీ ఎక్కువైపోతోంది. కేవలం కామెంట్లలోనే అసభ్యత వుందనుకుంటే పొరపాటే.! మార్ఫింగ్ ఫొటోలు, మార్ఫింగ్‌ వీడియోలకు సోషల్‌ మీడియాలో కొదువే లేదు.

సినీ, రాజకీయ ప్రముఖులే కాదు.. సాధారణ గృహిణులు కూడా సోషల్‌ మీడియాలో ఈ మార్ఫింగ్‌ బారిన పడుతున్నారు. స్మార్ట్‌ ఫోన్ల పుణ్యమా అని ఫొటోలు చాలా తేలిగ్గా దొరికేస్తున్నాయి. సెల్పీ తీసుకున్నట్లు నటించి.. ఇతరుల ఫొటోల్ని, వీడియోల్ని తీసి సోషల్‌ మీడియాలో పోస్ట్‌ చేస్తున్నారు.. వాటిని మార్ప్ చేసి మళ్ళీ పోర్న్‌ సైట్స్‌లో పోస్ట్‌ చేసేస్తుండడం మరింత జుగుప్సాకరమైన విషయం.

హీరోయిన్‌ మీరా చోప్రా, తనను ఎన్టీఆర్‌ అభిమానులు బెదిరిస్తున్నారనీ, గ్యాంగ్‌ రేప్‌ చేస్తామని హెచ్చరిస్తున్నారనీ పేర్కొంటూ ఈ మేరకు పోలీసులకు ఫిర్యాదు చేసిన విషయం విదితమే. నిజానికి, మీరా చోప్రా లాంటి బాధితులు చాలామందే వున్నారు సినీ పరిశ్రమలో. అసలు బాధితులు కానివారెవరు.? అని ప్రశ్నించాలిప్పుడు.

హీరోల అభిమానులతా చెడ్డోళ్ళు కాదు.. కానీ, కొందరు చెడ్డ అభిమానులూ వున్నారు. వాళ్ళతోనే వస్తోంది అసలు సమస్య అంతా. స్టార్‌ హీరోల దగ్గర్నుంచి.. సాధారణ హీరోల వరకూ అభిమానులు లేనిదెవరికి.? హీరోయిన్లకీ అభిమానులున్నారు. వీళ్ళ అత్యుత్సాహమే ఆయా సెలబ్రిటీల కొంప ముంచేస్తోంది. ప్రతిదానికీ ‘ఆ హీరో వచ్చి సారీ చెప్పాలి..’ అనే డిమాండ్లు రావడం ఓ ఫ్యాషన్‌గా మారింది. ఎంతమందికి సారీ చెబుతారు.? సారీ చెప్పుకుంటూ పోతే, ఒక్క రోజులో లక్ష సార్లు చెప్పాల్సి రావొచ్చేమో. కేసులు నమోదవుతాయి.. అరెస్టులు జరుగుతాయి.. మళ్ళీ కథ మామూలే.

ఇంటర్నెట్‌లో పోర్న్‌ కంటే పెద్ద వైపరీత్యంగా తయారైంది ఈ ట్రోలింగ్‌. దీన్ని ఆపడం అంత తేలికైన వ్యవహారం కాదు. కానీ, ఆగి తీరాల్సిందే.