కూల్చివేతలు.. కోర్టు చీవాట్లు.! ఇదొక నిరంతర ప్రక్రియ.!

మాజీ మంత్రి, టీడీపీ సీనియర్ నేత చింతకాయల అయ్యన్నపాత్రుడు గత కొద్ది రోజులుగా వైసీపీ అధినేతనీ, ఆ పార్టీ నాయకుల్నీ తిట్టిన తిట్టు తిట్టకుండా తిడుతున్న సంగతి తెలిసిందే. సీనియర్ పొలిటీషియన అయిన అయ్యన్న, తన స్థాయిని దిగజార్చుకుని మరీ రాజకీయ విమర్శలు చేస్తున్నారన్నదాంట్లో ఎవరికీ ఎలాంటి సందేహాల్లేవు. అయితే, మంత్రులే బూతులు మాట్లాడుతున్నప్పుడు, ప్రతిపక్ష నేతలు ఆ స్థాయిలోనే, ఆ మంత్రులకు అర్థమయ్యే భాషలోనే సమాధానమిస్తే తప్పేముంది.? అన్నది వేరే చర్చ.

తమలపాకుతో నువ్వొకటిస్తే.. తలుపు చెక్కతో నోనొకటిస్తా.. అని వెనకటికి ఎవడో అన్నాడట. అలా తయారయ్యింది వ్యవహారం. వీళ్ళు తిడుతున్నారు, వాళ్ళు ఇంకా గట్టిగా తిడుతున్నారు. అదీ సంగతి. మధ్యలో అధికారులెందుకు బదనాం అవ్వాలి.? ఔను, అధికారుల్ని ఎందుకు బలిపశువుల్ని చెయ్యాలి.?

‘చంద్రబాబు హయాంలో వ్యవస్థల్ని టీడీపీ వాడుకుంది.. ఇప్పుడు అందుకు భిన్నంగా ఏమీ జరగడంలేదు..’ అన్నట్టుగా వ్యవహరిస్తోంది వైసీపీ. అందుకే కదా, చంద్రబాబు పార్టీని జనం మూలన కూర్చోబెట్టింది.? ఇప్పుడు వైసీపీకి కూడా జనం అదే సన్మానం చేయాలని బహుశా వైసీపీ నేతలు చేస్తున్నారేమో.

అయ్యన్నపాత్రుడ్ని రాజకీయంగా ఎదుర్కోలేక, ఆయన ఇంటి కూల్చివేతలకు స్కెచ్ వేసింది అధికార పార్టీ. రాజు తలచుకుంటే దెబ్బలకు కొదవా.? అన్నట్టు, అధికార పార్టీ తలచుకుంటే, చట్టం ఎవరి పని చేస్తుందో ప్రత్యేకంగా చెప్పాల్సిన పనిలేదు కదా.? ఆగమేఘాల మీద అయ్యన్న ఇంటి వైపుకి జేసీబీలు దూసుకెళ్ళాయి.. కూల్చివేతలు షురూ అయ్యాయి.

తర్వాత కథేంటి.? అన్నది చాలామందికి తెలిసిన విషయమే. అయ్యన్న కోర్టును ఆశ్రయించడం, కోర్టు నుంచి అధికారులకు చీవాట్లు పడటం.. అన్నీ షరామామూలుగానే జరిగిపోయాయి. ఇక్కడ అధికారులే అడ్డంగా బుక్కయిపోయారు. ప్రతిసారీ ఇంతే. విశాఖలో విమానాశ్రయం దగ్గర చంద్రబాబు అడ్డగింత దగ్గరనుంచి చెప్పుకుంటూ పోతే, చాలా కేసుల్లో అధికారులు అడ్డంగా.. అదీ హైకోర్టులో బుక్కయిపోయిన వైనాన్ని చూస్తూనే వున్నాం.

అధికారులు.. అంటే, అధికార పార్టీకి కొమ్ముకాసేవాళ్ళు కాదు మహాప్రభో.. అని ప్రభుత్వోద్యోగులకు ఎప్పుడు అర్థమవుతుందో ఏమో.! అప్పట్లో టీడీపీకి, ఇప్పుడు వైసీపీకి.. చెంచాగిరీ చేయడమేనా అధికారుల పని.? అన్న ప్రశ్నలకు ఏ ఉద్యోగ సంఘాలు సమాధానం చెప్పగలుగుతాయి.?

ఈ పద్ధతి మారాలి.! అలా మారాలంటే ముందుగా ప్రజల ఆలోచనల్లో మార్పు రావాలి. కానీ, అది సాధ్యమయ్యే పనేనా.?