దర్శకుడు మహి వి రాఘవ్ ఓ రాజకీయ సినిమా తీశాడు.! ఒకటి కాదు, రెండు సినిమాలు తీశాడు. తన అభిమాన రాజకీయ నాయకుడు వైఎస్ జగన్ మోహన్ రెడ్డి కోసం తీసిన సినిమాలవి. మొదటిది ‘యాత్ర’, రెండోది ‘యాత్ర-2’. ముందు ముందు ‘యాత్ర-3’, ‘యాత్ర-4’ ఇలా ఎన్నయినా ఆయన తీయొచ్చుగాక. అది ఆయనిష్టం.
వైఎస్ జగన్ మోహన్ రెడ్డి కోసం సినిమా తీశాడు గనుక, ఆ వైఎస్ జగన్ మోహన్ రెడ్డి నుంచి ఖచ్చితంగా ఏదో ఒక లబ్దిని మహి వి రాఘవ్ ఆశించి వుంటాడు. మొదటి సినిమాతో ఆ లబ్దిని అందుకుని వుంటాడు. రెండో సినిమాతోనూ లబ్దిని ఆశించి, అందుకుని వుంటాడు.. లేకపోతే, అందుకోబోతుంటాడు.!
అయితే, అందుకోబోయేది వైసీపీ నుంచి అయితే, ఎవరికీ ఎలాంటి ఇబ్బందీ లేదు. రాష్ట్ర ప్రభుత్వం నుంచి కావడంతోనే అసలు సమస్య.! ఓ రెండెకరాల భూమి.. కాదు కాదు, ఇరవై ఎకరాల భూమిని మహి వి రాఘవ్కి ఇవ్వాలని ఆంధ్ర ప్రదేశ్ ప్రభుత్వం అనుకుంటోందిట.. అన్నది ఓ వార్త.
పద్ధెనిమిది నెలల క్రితమే సదరు భూమి కోసం మహి వి రాఘవ్ దరఖాస్తు చేసుకున్నాడట. రేపో మాపో అది క్లియర్ అయిపోతుందన్న ప్రచారమూ జరుగుతోంది. మహి వి రాఘవ్ తలచుకుంటే, అంత భూమిని కొనుక్కోవడం పెద్ద కష్టమేమీ కాదు. కానీ, ప్రభుత్వం నుంచి తీసుకోవాలనుకోవడమే చిత్రం.
అంత మొత్తంలో భూమిని మహి వి రాఘవ్కి కానుకగా వైసీపీ ఇవ్వాలనుకుంటే, అది ప్రైవేటు వ్యవహారమైతే అసలు ఇంత చర్చా అనవసరం. కోరుకున్నది ప్రభుత్వం కేటాయించాల్సిన భూమి కావడంతోనే ఇంత రగడ.!
పైగా, ఇక్కడ ‘సీమ అభివృద్ధికి సినీ పరిశ్రమ బాధ్యత తీసుకోలేదు’ అంటూ రాజకీయ ఆరోపణలు చేశాడు మహి వి రాఘవ్. అంతే కాదు, తానూ సీమ బిడ్డనని చెప్పుకున్నాడు. విక్టిమ్ కార్డ్ తెరపైకి తెచ్చాడు. నిఖార్సయిన పొలిటీషియన్ అయ్యేందుకు మహి వి రాఘవ్కి అన్ని అర్హతలూ వున్నట్టే. భూమి ఎందుకు.? వైసీపీ నుంచి ఏదో ఒక టిక్కెట్టు తీసుకోవచ్చు కదా.? పోనీ, ఎమ్మెల్సీగా అవకాశం.? లేదంటే, ఏదన్నా నామినేటెడ్ పోస్ట్.!
ఇంత యాతన ఎందుకు రాఘవా.? జగన్ మోహన్ రెడ్డిని కలిసి పార్టీ పదవి లేదా, ప్రభుత్వంలో ఏదో ఒక పదవి తీసుకోవచ్చు కదా.? ఈ విక్టిమ్ కార్డ్.. రాయలసీమ సెంటిమెంట్.. సినీ పరిశ్రమపైన ఆరోపణలు.. ఇవన్నీ అవసరమా.?