వైఎస్‌ జగన్‌తో చిరంజీవి భేటీ.. ఎప్పుడంటే.!

ఆంధ్రప్రదేశ్‌ ముఖ్యమంత్రి వైఎస్‌ జగన్‌ మోహన్‌ రెడ్డితో మాజీ కేంద్ర మంత్రి, సినీ నటుడు చిరంజీవి భేటీ కానున్నారనే ప్రచారం సినీ, రాజకీయ వర్గాల్లో జోరుగా సాగుతోంది. ఈ భేటీ వెనుక ప్రత్యేక కారణం ఒక్కటే వుందనీ, అది ‘సైరా నరసింహారెడ్డి’ సినిమా గురించేనని తెలుస్తోంది. ‘సైరా నరసింహారెడ్డి’ సినిమాని అత్యంత భారీ స్థాయిలో విడుదల చేసేందుకు సన్నాహాలు చేస్తున్న సంగతి తెల్సిందే. అక్టోబర్‌ 2న ఈ సినిమా ప్రేక్షకుల ముందుకు రానుంది.

స్పెషల్‌ షోలకు అనుమతులు, టిక్కెట్‌ ధరలు పెంచుకునే వెసులుబాటు వంటి అంశాలపై ముఖ్యమంత్రి వైఎస్‌ జగన్‌తో చిరంజీవి చర్చిస్తారన్నది తాజాగా విన్పిస్తోన్న ఊహాగానాల సారాంశం. ఇటీవల విడుదలైన ‘సాహో’ సినిమాకి సంబంధించి టిక్కెట్ల ధరల పెంపుపై అధికారికంగా అనుమతి ఇవ్వకపోయినా, ఆంధ్రప్రదేశ్‌లో దాదాపు అన్ని చోట్లా పెంచిన టిక్కెట్‌ ధరలతోనే సినిమాని ప్రదర్శించిన విషయం విదితమే. ‘కొన్ని సినిమాల్ని ప్రత్యేకంగా చూడలేం..’ అని అప్పట్లో వైఎస్‌ జగన్‌ సర్కార్‌ సెలవిచ్చింది.

కానీ, ‘సైరా నరసింహారెడ్డి’కి షాక్‌ ఇచ్చే క్రమంలోనే, ‘సాహో’ సినిమా విషయంలో ఆ ప్రకటన చేశారన్నది ఇన్‌సైడ్‌ సోర్సెస్‌ కథనం. ఇదిలా వుంటే, నేరుగా చిరంజీవి రంగంలోకి దిగకుండా, కొందరు సినీ పెద్దల్ని వెంటేసుకుని నిర్మాత రామ్‌చరణ్‌, వైఎస్‌ జగన్‌ని కలుస్తారన్న ప్రచారం కూడా జరుగుతుండడం గమనార్హం.

తెలంగాణలో ‘సైరా నరసింహారెడ్డి’కి పెద్దగా సమస్యల్లేవ్‌. ఎందుకంటే, టీఆర్‌ఎస్‌ వర్కింగ్‌ ప్రెసిడెంట్‌ కేటీఆర్‌, నిర్మాత రామ్‌చరణ్‌కి అత్యంత సన్నిహితుడు. దాంతో తెలంగాణలో ‘సైరా నరసింహారెడ్డి’ విడుదలకు సంబంధించి టిక్కెట్ల ధర పెంపు కావొచ్చు, అదనపు షోల ప్రదర్శన కావొచ్చు.. సమస్య వుండదని అంటున్నారు.