చిరంజీవిలోని యాంగ్రీ, డైనమిక్ స్కిల్స్ యువతకు విపరీతంగా ఆకట్టుకుంటున్న దశలో వచ్చిన సినిమాల్లో.. సినిమా మొత్తం చిరంజీవే. ఆయన కోసమే సినిమా అంటే ధియేటర్లకు ప్రేక్షకులు క్యూ కట్టారు. ఆ దశలో చేసినవే చిరంజీవి, చట్టంతో పోరాటం, రుస్తుం సినిమాలు ఉన్నాయి. తన పేరుతోనే వచ్చిన సినిమా చిరంజీవి. ఈ సినిమాలో చిరంజీవి చాలా పెద్ద ప్రయోగమే చేశారు. క్లైమాక్స్ లో చిరంజీవి పాత్ర చనిపోతుంది. యూత్ లో విపరీతమైన క్రేజ్ ఉన్న హీరో పాత్ర చనిపోవడం సినిమాపైనే ఎఫెక్ట్ పడుతుంది. ఫలితమెలా ఉన్నా చిరంజీవి లుక్స్, ఎనర్జిటిక్ పెర్ఫార్మెన్స్ తో నటించారు. ఫస్ట్ సాంగ్ సినిమాకే హైలైట్. కథలో భాగంగా చిరంజీవి కాస్త చూపిన నెగటివ్ షేడ్స్, భావోద్వేగం, హావభావాలతో నటించి మెప్పించారు. ఈ సినిమాలో నటించడం చిరంజీవి చేసిన పెద్ద సాహసంగా చెప్పుకోవాలి.
చట్టంతో పోరాటం..
చట్టంతో పోరాటం సినిమా చిరంజీవి కెరీర్లో మంచి హిట్స్ లో ఒకటిగా నిలిచింది. కథ, కథనం, చిరంజీవి, పాటలు, యాక్షన్ సినిమాకు మేజర్ ప్లస్ పాయింట్స్. చిరంజీవి పాత్ర చాలా యాంగ్రీనెస్ తో కూడుకున్నది. విలన్ తో సన్నివేశాల్లో చిరంజీవి డైలాగ్ వెర్షన్, నటన సినిమా సక్సెస్ కు కారణమయ్యాయి. జైలు, కోర్టు సన్నివేశాల్లో చిరంజీవి యాంగ్రీ నెస్ స్పష్టంగా కనిపిస్తుంది. ఫైట్స్ లో చిరంజీవి మరింతగా మెప్పించారు. అప్పటి చిరంజీవి ఇమేజ్ కు తగ్గ కథ కావడంతో సినిమా సూపర్ హిట్ అయింది. పాటల్లో చిరంజీవి మార్క్ డ్యాన్సులు కిక్కెక్కిస్తాయి. అప్పటికే చిరంజీవితో సినిమాలు చేసి ఆయన స్పార్క్ ని చూసిన నిర్మాత కె.దేవీవరప్రసాద్ తర్వాతా చిరంజీవితోనే వరుస సక్సెస్ లు సాధించిన సినిమాల్లో ఇదొకటిగా నిలిచింది.
రుస్తుం..
రుస్తుం సినిమా చిరంజీవి చేసిన అనేక రివెంజ్ డ్రామాల్లో ఒకటి. అయితే.. ఓ దశలో ఇంతై ఇంతింతై అన్నట్టు పెరుగుతున్న చిరంజీవి ఇమేజ్ ను దృష్టిలో పెట్టుకుని తెరకెక్కించిన సినిమా ఇది. సినిమాలో చిరంజీవి ఎంట్రన్స్, ఫైట్ సినిమాకే హైలైట్ గా నిలిచింది. ఒంటిపై బనియన్, సిగరెట్ కాలుస్తూ చిరంజీవిలోని పూర్తి మాస్ మోడ్ ని ఉపయోగించి తీసిన ఫైట్ స్పెషల్ గా నిలిచింది. కుర్చీలో కూర్చుని బల్ల మీద కాలు పెట్టి సిగరెట్ కాల్చే స్టిల్ చిరంజీవికి మాత్రమే ప్రత్యేకం అనే రేంజ్ లో ఆకట్టుకుంటుంది. ఎద్దుతో ఫైట్, యాక్షన్ సన్నివేశాలు ఆకట్టుకుంటాయి. పల్లెటూరి నేపథ్యంలో సాగే సినిమాలో చిరంజీవి లుక్స్, కామెడీ, పాటలు ఆకట్టుకుంటాయి.