‘అబ్బే.! చాలా కష్టమడీ.! టీడీపీని జనం నమ్మే పరిస్థితి లేదు. మీరు ముఖ్యమంత్రి అంటే, క్షేత్ర స్థాయిలో పరిస్థితులు అస్సలు బాగా లేదు. చెరి సగం ఓట్లు.. చెరిసగం పాలన. ముందైతే, జనసేనకే ముఖ్యమంత్రి అభ్యర్థిత్వం విషయంలో అవకాశమిచ్చేద్దాం..’ అంటూ టీడీపీలో కొందరు, ఆ పార్టీ అధినేత చంద్రబాబుకి సలహాలిస్తున్నారట.
‘కొన్ని నియోజకవర్గాల్లో మన పార్టీ నేతలే, జనసేనలోకి దూకేస్తామంటున్నారు. గ్రౌండ్ లెవల్లో పరిస్థితులు ఘోరంగా వున్నాయ్.! ఇటు లోకేష్ పాదయాత్రకి ఖర్చులు చేసి.. అటు, మీ యాత్రలకి ఖర్చు చేసి.. కింది స్థాయి నాయకులు చితికిపోతున్నారు..’ అంటూ చంద్రబాబు దగ్గర మొరపెట్టుకుంటున్నారట కొందరు నేతలు.
ఏంటి.. ఇదంతా నిజమేనా.? నిప్పు లేకుండా పొగ రాదు కదా.! మరీ, అంత దారుణంగా వుండకపోవచ్చుగానీ, కొంత కష్టంగానే వుంది తెలుగుదేశం పార్టీ పరిస్థితి. 2024 ఎన్నికలు టీడీపీకి చావో రేవో.. అన్న చందానే వుండబోతున్నాయి. గెలిస్తే సరే సరి.! ఓడితే, ఇక కోలుకోవడం అసాధ్యమన్న అభిప్రాయంతో తెలుగు తమ్ముళ్ళు వున్నారు.
కానీ, సోషల్ మీడియాలో మాత్రం, టీడీపీ మద్దతుదారులు జనసేన పార్టీని రెచ్చగొడుతున్నారు. పవన్ కళ్యాణ్ మీద నానా రకాలుగా దూషణలకు దిగుతున్నారు. తాజాగా రాష్ట్రంలో పలు చోట్ల పంచాయితీ ఎన్నికలు జరిగాయి. వీటిల్లో, టీడీపీ – జనసేన మద్దతుదారులే మెజార్టీ స్థానాలు దక్కించుకున్నారు. అధికార వైసీపీ వెనకబడిపోయింది.
పార్టీల గుర్తుల మీద ఈ ఎన్నికలు జరగవు గనుక.. విజయాల్ని తమ తమ పార్టీల ఖాతాల్లో ఆయా పార్టీలు వేసేసుకుంటాయి. కానీ, సంబరాలు జరుగుతున్న తీరు చూస్తోంటే, జనసేన అంచనాలకు మించి సత్తా చాటినట్లే కనిపిస్తోంది. ఇవన్నీ విశ్లేషిస్తున్న టీడీపీ, జనసేన సాయం లేకుండా ఏమీ చేయలేమనే నిర్ణయానికి వచ్చేసిందనే భావించాలేమో.!
మరి, పవన్ కళ్యాణ్నే ముఖ్యమంత్రి అభ్యర్థిగా చంద్రబాబు ప్రొజెక్ట్ చేయడానికి సమయం ఆసన్నమైందని అనుకోవచ్చా.?