బీజేపీకి ఆప్షన్‌ లేదా.? చంద్రబాబుతోనే మళ్ళీ చేతులు కలపాలా?

భారతీయ జనతా పార్టీకి ఇంకో ఆప్షన్‌ కన్పించడంలేదట. ఆంధ్రప్రదేశ్‌లో మళ్లీ తెలుగుదేశం పార్టీతో చేతులు కలపడమే మంచిదన్న భావనతో ఆ పార్టీ జాతీయ నాయకత్వం వుందట. అత్యంత విశ్వసనీయ వర్గాల సమాచారం ప్రకారం, బీజేపీకి చెందిన జాతీయ స్థాయి ముఖ్య నేత ఒకరు, తెలుగుదేశం పార్టీ అధినేత నారా చంద్రబాబునాయుడితో సంప్రదింపుల కోసం ప్రయత్నిస్తున్నట్లు తెలుస్తోంది.

అదేంటీ, తెలుగుదేశం పార్టీని ఆంధ్రప్రదేశ్‌లో నామరూపాల్లేకుండా చేయాలనుకుంటున్న బీజేపీ, మళ్ళీ ఆ టీడీపీకి జీవం పోయాలని ఎలా అనుకుంటుంది.? అంటే, రాజకీయాల్లో నిన్నటి శతృవు రేపు మిత్రుడిగా మారొచ్చు. నేటి మిత్రుడు, రేపటికి శతృవుగా మాచొఉ్చ. అంతెందుకు, ఒకప్పుడు టీడీపీ – బీజేపీ కలిసి పనిచేశాయి. ఆ తర్వాత రెండు పార్టీల మధ్యా వైరం వచ్చింది. తిరిగి మళ్ళీ చేతులు కలిపాయి ఆ రెండు పార్టీలు. ఇప్పుడు మళ్ళీ విడిపోయాయి, రేప్పొద్దున్న మళ్ళీ ఎందుక కలవకూడదు.!

గత రెండు నెలలుగా ఆంధ్రప్రదేశ్‌లో రాజకీయ పరిణామాల్ని అంచనా వేసిన బీజేపీ పెద్దలు, ఎంత గింజుకున్నా గ్రామ స్థాయిలో జనం, బీజేపీని నమ్మడం లేదన్న నిర్ధారణకు వచ్చారట. దాంతో, టీడీపీని కలుపుకుపోయిన.. అధికార పక్షంపై ‘ఉమ్మడి దాడి’ చేయడమే బెటర్‌.. అన్న ఆలోచన చేస్తున్నారట బీజేపీ పెద్దలు. ఈ విషయమై ఏపీ బీజేపీకి చెందిన నేతలు మాత్రం, అధిష్టానం ఆలోచనలతో ఏకీభవించడంలేదు.

‘రాష్ట్రంలో సొంతంగా ఎదిగేందుకు పరిస్థితులు అనుకూలంగా వున్నాయి’ అంటూ బీజేపీ సీనియర్‌ నేత ఒకరు, అధిష్టానానికి నివేదిక పంపితే, ‘మీ చెత్త నివేదికల్లో పస ఎంతో ఇటీవలి ఎన్నికల్లో చూశాం కదా..’ అని బీజేపీ నాయకత్వం తలంటు పోసేసిందట. ఏమో, రానున్న రోజుల్లో ఏమైనా జరగొచ్చు. వైఎస్‌ జగన్‌ తమ మాట వినడం లేదన్న నిర్ణయానికి వచ్చాక బీజేపీ, వైసీపీ మీద విమర్శల జోరు పెంచి, చంద్రబాబు మీద కొంత సాఫ్ట్‌ కార్నర్‌ ప్రదర్శిస్తోంది. ఈ పరిణామాలు టీడీపీకి ఎంతో కొంత లాభం చేకూర్చేవే.