పేదల కడుపుపై దెబ్బ.. అన్న క్యాంటీన్ల మూసివేత

ఆంధ్రప్రదేశ్ లోని వైఎస్సార్ సీపీ సర్కారు మరో కీలక నిర్ణయం తీసుకుంది. పేదల ఆకలి తీరుస్తున్న అన్న క్యాంటీన్లను మూసివేయాలని నిర్ణయించింది. ఈ మేరకు సంబంధిత అధికారులకు మౌఖిక ఆదేశాలు జారీచేసింది. ఆగస్టు ఒకటో తేదీ నుంచి రాష్ట్రంలో అన్న క్యాంటీన్లు పనిచేయవు. పేదలకు రూ.5కే భోజనం పెడుతున్న ఈ క్యాంటీన్లను ఇలా అర్థంతరంగా మూసివేయాలన్న నిర్ణయంపై విమర్శలు వస్తున్నాయి.

సాధారణంగా ప్రభుత్వం మారినప్పుడు గత ప్రభుత్వం చేపట్టిన పథకాలను కొత్త సర్కారు కొనసాగించేందుకు ఇష్టపడదు. ఇదే తరహాలో గత ప్రభుత్వం చేపట్టిన పథకాలను జగన్ సర్కారు ఒక్కోదాన్నీ తొలగిస్తూ వస్తోంది. తాజాగా అన్న క్యాంటీన్లను మూసివేయాలని నిర్ణయం తీసుకుంది. తమిళనాడు దివంగత సీఎం జయలలిత ప్రవేశపెట్టిన అమ్మ క్యాంటీన్లను స్ఫూర్తిగా తీసుకుని టీడీపీ అధినేత చంద్రబాబు 2014 ఎన్నికల సమయంలో ఈ పథకం ప్రకటించారు.

రాష్ట్రవ్యాప్తంగా అన్న క్యాంటీన్ల ద్వారా రూ.5కే పేదలకు భోజనం పెడతామని ప్రకటించారు. అయితే, అధికారంలోకి వచ్చిన నాలుగేళ్ల తర్వాత 2018లో అన్న క్యాంటీన్లను ప్రారంభించారు. 13 జిల్లాల్లో మొత్తం 204 క్యాంటీన్ల ద్వారా పేదల ఆకలి తీర్చడానికి శ్రీకారం చుట్టారు. అల్పాహారం, మధ్యాహ్న భోజనం, రాత్రి భోజనాలను ఒక్కొక్కటి రూ.5కే అందజేయాలన్నది వీటి ఉద్దేశం. ఒక్కో క్యాంటీన్ భవనాన్ని రూ.35 లక్షల వ్యయంతో నిర్మించగా.. భోజన ఏర్పాట్ల బాధ్యతను అక్షయపాత్ర అనే సంస్థకు అప్పగించారు.

వీరు భోజనానికి రూ.5 చొప్పున వసూలు చేసుకోగా.. ప్రభుత్వం ఉదయం అల్పాహారం, రెండు పూటలా భోజనానికి కలిపి రూ.58 చెల్లిస్తుంది. ఒక్కో క్యాంటీన్లో రోజుకు మూడు పూటలా వెయ్యి నుంచి 1200 మంది ఈ అవకాశాన్ని వినియోగించుకునేలా ఏర్పాట్లు చేశారు. అయితే, వైఎస్సార్ సీపీ అధికారంలోకి వచ్చిన తర్వాత అన్న క్యాంటీన్లను క్రమంగా ఎత్తివేయాలని నిర్ణయించింది. తొలుత 1200 నుంచి 800 మందికి అనంతరం 600 మందికి కుదించింది. తాజాగా జూలై 31తో మొత్తం మూసివేయాలని ఆదేశాలిచ్చింది.

గత ప్రభుత్వం తీసుకొచ్చిన ఈ పథకం కొనసాగించడం ఇష్టం లేకుంటే ప్రత్యామ్నాయ ఏర్పాట్లు చేసిన తర్వాతే దీనిని మూసివేస్తే బాగుంటుందనే అభిప్రాయాలు వ్యక్తమవుతున్నాయి. రాజన్న క్యాంటీన్ ద్వారా తాము పేదలకు భోజనం అందజేస్తామని వైఎస్సార్ సీపీ నేతలు చెబుతున్నా.. వాటిని ప్రారంభించకుండా పాతవాటిని మూసివేయడం సబబు కాదని అంటున్నారు. పేదల కడుపుపై దెబ్బ కొట్టొద్దని కోరుతున్నారు.