నీళ్ళు నిప్పులు.. ఏపీ, తెలంగాణ మధ్య ఎందుకీ తిప్పలు.?

డైవర్షన్ రాజకీయం.. ఇంతకన్నా గొప్పగా తెలుగు రాష్ట్రాల మధ్య ‘నీళ్ళు.. నిప్పులు..’ అంటూ జరుగుతోన్న రాజకీయం గురించి అభివర్ణించలేం. తప్పు మీది.. కాదు తప్పు మీదే.. అంటూ ఏళ్ళ తరబడి గొడవలు నడుస్తూనే వున్నాయి. చంద్రబాబు హయాంలో ఏకంగా ప్రాజెక్టుల మీదనే అధికారులు కొట్టుకునే పరిస్థితి వచ్చింది. ఇప్పుడూ అదే పరిస్థితి రాబోతోందా.? అంటే, ‘అబ్బే.. మాది గొడవ పడే ప్రభుత్వం కాదు..’ అని అంటోంది వైసీపీ.

తెలంగాణలో కాళేశ్వరం సహా అనేక కీలకమైన ప్రాజెక్టులు (లిఫ్టు ప్రాజెక్టులు) పూర్తవుతున్నాయి. ఆంధ్రపదేశ్ ఏం చేస్తోంది.? అంటే, సర్దుకుపోతోంది. నిజానికి, కాళేశ్వరం ప్రాజెక్టు పట్ల ఆంధ్రప్రదేశ్ రాష్ట్రానికి అభ్యంతరాలున్నాయి. కానీ, ఆంధ్రపదేశ్ ముఖ్యమంత్రి వైఎస్ జగన్ మోహన్ రెడ్డి, తెలంగాణకు వెళ్ళి మరీ.. కాళేశ్వరం ప్రాజెక్టు ప్రారంభోత్సవంలో పాల్గొన్నారు. అప్పట్లో ఈ విషయమై పెద్దయెత్తున విమర్శలు వచ్చిపడ్డాయి.

రెండు రాష్ట్రాల ముఖ్యమంత్రుల మధ్య సఖ్యత అవసరమే. కానీ, ఆ సఖ్యత వల్ల ఇరు రాష్ట్రాలకీ లాభం వుండాలి. చంద్రబాబు హయాంలో తెలంగాణ ముఖ్యమంత్రి కేసీఆర్, స్వయంగా చంద్రబాబు దగ్గరకు వెళ్ళారు.. అమరావతి శంకుస్థాపన కార్యక్రమంలోనూ పాల్గొన్నారు. కానీ, ఆ తర్వాత ఏం జరిగిందో అందరం చూశాం. కృష్ణా నది నుంచి నీళ్ళను ఎత్తి పోసేస్తామంటోంది తెలంగాణ ప్రభుత్వం.. అదే కృష్ణా నది నుంచి నీళ్ళను లాక్కెళతామంటోంది ఆంధ్రపదేశ్ ప్రభుత్వం.

అయితే, తెలంగాణ ప్రభుత్వం చేతల్లో ముందుంటోంది.. ఆంధ్రపదేశ్ ఎప్పుడూ మాటలకే పరిమితమవుతోంది. ఫలితంగా ఆంధ్రపదేశ్ ప్రతిసారీ నష్టపోతూనే వుంది. ఎవర్ని మభ్యపెట్టడానికి ఆంధ్రపదేశ్ రాష్ట్రంలో ఈ ‘మాటల రాజకీయం’ నడుస్తోంది.? తెలంగాణ రాష్ట్రం కాళేశ్వరం ప్రాజెక్టుని పూర్తి చేసుకోగలిగినప్పుడు.. ఆంధ్రపదేశ్ ఎందుకు పోలవరం ప్రాజెక్టుని పూర్తి చేసుకోలేకపోతోంది.?

నిజానికి, ఇరు రాష్ట్రాల మధ్య నీటి వివాదం పరిష్కారం కోసం కేంద్రం జోక్యాన్ని కోరాలి.. రెండు రాష్ట్రాల్లోని ప్రభుత్వాలు. ఆ అవసరం ఆంధ్రపదేశ్ రాష్ట్రానికే ఎక్కువ. కానీ, ఏపీ అడగాల్సిన స్థాయిలో అడగడంలేదు. కేంద్రాన్ని ఏ విషయంలోనూ ప్రశ్నించలేని ప్రభుత్వం రాష్ట్రంలో వుండడమే.. రాష్ట్రానికి శాపం.. అది అప్పుడు చంద్రబాబు ప్రభుత్వమైనా, ఇప్పుడు జగన్ ప్రభుత్వమైనా.