ఢిల్లీపై బీజేపీ పెత్తనం: ప్రజలెందుకు.? ప్రజాస్వామ్యమెందుకు.?

ఢిల్లీ అనేది కేంద్ర పాలిత రాష్ట్రం. అక్కడ అసెంబ్లీ వుంటుంది.. ముఖ్యమంత్రి వుంటారు.. కానీ, పెత్తనమంతా లెఫ్టినెంట్ గవర్నర్‌దే. ఢిల్లీకి పూర్తిస్థాయి రాష్ట్ర హోదా ఇవ్వాలనేది అక్కడి అదికార ఆమ్ ఆద్మీ పార్టీ గత కొంతకాలంగా చేస్తున్న నినాదం. దేశ రాజధాని గనుక, ఢిల్లీ విషయంలో రెండో ఆలోచన చేయలేమని.. కేంద్రంలో అధికారంలో వున్న బీజేపీ చెబుతోంది.

అలాగని, ఢిల్లీ పాలన మొత్తాన్నీ ప్రజలెన్నుకున్న ప్రభుత్వం నుంచి దూరం చేసి, కేంద్రమే తన చెప్పుచేతల్లో పెట్టకుని, లెఫ్టినెంట్ గవర్నర్ ద్వారా పరిపాలిస్తామంటే ఎలా.? ఇప్పుడున్న అధికారాలే చాలా ఎక్కువనుకుంటే లెఫ్టినెంట్ గవర్నర్‌కి మరిన్ని అధికారాలు కట్టబెడుతూ కేంద్రం తాజాగా పార్లమెంటులో చట్టం చేసింది.

ఢిల్లీ పీఠమెక్కాలని గతంలో భంగపడింది బీజేపీ.. అదీ రెండు సార్లు. దాంతో, ఎలాగైనా ఢిల్లీ మీద పెత్తనం చేయాలన్న కోణంలో ‘లెఫ్టినెంట్ గవర్నర్’ పదవిని అడ్డంపెట్టకుని అడ్డగోలు రాజకీయం చేస్తోంది. అధికార ఆమ్ ఆద్మీ పార్టీకి చెందిన ప్రముఖులపై.. ఎప్పటికప్పుడు కేంద్ర ప్రభుత్వం వివాదాస్పద రీతిలో సీబీఐ వంటి సంస్థల ద్వారా దాడులు చేయించడం చూస్తూనే వున్నాం. ముఖ్యమంత్రి అరవింద్ కేజ్రీవాల్ సైతం కేంద్ర ప్రభుత్వ వేధింపుల్ని ఎదుర్కోవాల్సి వస్తోంది. ఢిల్లీ ప్రజలు ఆమ్ ఆద్మీ పార్టీకి సంపూర్ణ మెజార్టీ కట్టబెట్టిన విషయాన్ని కేంద్రంలో అధికారంలో వున్న మోడీ సర్కార్ గుర్తించలేకపోతే ఎలా.?

ఒక్క ఢిల్లీలోనే కాదు, దేశంలోని మిగతా కేంద్ర పాలిత రాష్ట్రాలు, రాష్ట్రాలపైనా కేంద్రంలోని మోడీ సర్కార్ పెత్తనం చేయడం ఇటీవలి కాలంలో బాగా పెరిగిపోయింది. రాష్ట్రాలకు రావాల్సిన కేంద్ర నిథుల్లో కోటా.. ప్రాజెక్టులకు సంబంధించిన నిధులు.. ఇలా అన్ని విషయాల్లోనూ రాష్ట్రాలకు సమస్యలు తప్పడంలేదు. కేంద్రం వద్ద ‘దేహీ’ అనాల్సిన పరిస్థితి దేశంలోని చాలా రాష్ట్రాలకు వచ్చేసింది. ప్రైవేటు సంస్థల పెత్తనం సైతం రాష్ట్ర ప్రభుత్వాల మీద పెరిగిపోయే స్థాయికి చెత్త సంస్కరణల్ని అమల్లోకి తెస్తోంది కేంద్రంలోని మోడీ సర్కార్.