గణతంత్ర వేడుకలపై కరోనా ఎఫెక్ట్.. ఈసారి ఎర్రకోటలో లేనట్టే!

ఏడాదిగా పట్టి పీడిస్తున్న కరోనా మహమ్మారి ఇప్పట్లో పోయే పరిస్థితి కనిపించడంలేదు. తాజాగా దీని ప్రభావం గణతంత్ర దినోత్సవ వేడుకలపైనా పడింది. ప్రస్తుతం దేశంలో కరోనా కేసులు తగ్గుముఖం పడుతున్నా.. కొత్త వైరస్ స్ట్రెయిన్ కలకలం రేపుతోంది. ఈ నేపథ్యంలో జనవరి 26న జరిగే గణతంత్ర దినోత్సవ వేడుకల్లో కేంద్రం భారీ మార్పులు చేసింది. వీక్షకుల సంఖ్యను బాగా తగ్గించడంతోపాటు మాస్కులు ధరించడం, భౌతికదూరం పాటించడం వంటి కరోనా నివారణ చర్యలను తప్పనిసరి చేసింది.

అలాగే స్వాతంత్ర్య భారతావని చరిత్రలోనే తొలిసారిగా ఈ సారి గణతంత్ర వేడుకలను ఎర్రకోట కు దూరంగా నిర్వహించాలని యోచిస్తున్నట్టు సమాచారం. ఆనవాయితీ ప్రకారం ఏటా గణతంత్ర వేడుకల పరేడ్ ఎర్రకోటలో ముగుస్తుంది. కానీ ఈసారి కరోనా కారణంగా విజయ్ చౌక్ నుంచి నేషనల్ స్టేడియం వరకు మాత్రమే పరేడ్ నిర్వహించే అవకాశం కనిపిస్తోంది. మొత్తం పరేడ్ దూరాన్ని 8.2 కిలోమీటర్ల నుంచి 3.3 కిలోమీటర్లకు తగ్గించనున్నట్టు తెలుస్తోంది. అంతేకాకుండా పరేడ్ లోని బృందాల్లో గతంలో 144 మంది ఉండగా.. ఈసారి 96కి కుదించాలని యోచిస్తోంది. ఇక వీక్షకుల సంఖ్యను లక్ష నుంచి 25వేలకు తగ్గించే అవకాశం ఉంది. 15 ఏళ్ల లోపువారికి ప్రవేశమే ఉండదు.

కాగా, ఈసారి గణతంత్ర వేడుకలకు ముఖ్య అతిథిగా బ్రిటన్ ప్రధాని బోరిస్ జాన్సన్ హాజరుకావాల్సి ఉంది. ప్రధాని మోదీ ఆహ్వానాన్ని అంగీకరించిన ఆయన.. గణతంత్ర దినోత్సవ వేడుకలకు వస్తానని ప్రకటించారు. అయితే, బ్రిటన్ లో స్ట్రెయిన్ వైరస్ ప్రతాపం చూపిస్తున్న తరుణంలో బోరిస్ పర్యటన ఉంటుందా ఉండదా అనేదానిపై ఇంకా స్పష్టత లేదు.